მოტივაციაც დიდი იყო: გამარჯვებული ფალავანი-5000, ფინალისტი-3000 და ბრინჯაოს პრიზიორი 2000 ლარს იღებდა ჯილდოდ.
ქართული ჭიდაობის ფედერაციის სასახელოდ უნდა ითქვას, რომ მაშინ, როცა ფალავნობის გამართვა კითხვის ნიშნის ქვეშ იდგა, მოკლე ხანში ყველა საორგანიზაციო საკითხი მოგვარდა და ასპარეზობაც დამაკმაყოფილებლად ჩატარდა.
მონაწილეთა შორის იყვნენ საქართველოს 2006, 2006 და 2009 წლის ფალავნები ზვიად ხანჯალიაშვილი, ლაშა გუჯეჯიანი და ადამ ოქრუაშვილი. ასეთი რამ იშვიათია ფალავნობის ისტორიაში.
სხვათა შორის, კიდევ
ეს ფალავნობა ქართული ჭიდაობის ეროვნული ფედერაციის სულ ახლახან არჩეული ახალი პრეზიდენტის, თემურ გიორგაძისთვის პირველი შეჯიბრება იყო.
თბილისელთა გარდა სარბიელზე ვიხილეთ აჭარის, გორის, თელავის, ცაგერის, დედოფლისწყაროს, საჩხერის, მცხეთის და ქარელის წარმომადგენლები. უბრალოდ, ისმის კითხვა, რატომ არ ჩანდნენ სხვა რეგიონები?
ქებათა ქება მოქმედ ფალავანს, ანუ 2009 წლის აბსოლუტურ ჩემპიონს, ადამ ოქრუაშვილს, რომელიც შარშან დუშეთის, წლეულს კი მცხეთის სახელს იცავდა (ორივე რაიონი ხომ მცხეთა მთიანეთის რეგიონია).
ადამ ოქრუაშვილმა ყველა შეხვედრა დამაჯერებლად წარმართა, თუმცა ფეხის ტკივილის გამო მისი გამოსვლა ფალავნობაზე ცოტა საეჭვოც კი იყო.
ფინალში გასასვლელ ორთაბრძოლაში ოქრუაშვილი 2007 წლის საქართველოს ფალავანს, ლაშა გუჯეჯიანს (თბილისი) ხვდებოდა. ადამი იგებდა შეხვედრას, როცა მორიგი გდება შეასრულა და გუჯეჯიანმა მუხლის ტრავმის გამო ბრძოლის გაგრძელება ვეღარ შეძლო.
ფინალში გადასასვლელ მეორე შეხვედრაში ზვიად ხანჯალიაშვილი (თელავი) ქარელელ სოსო მსხალაძეს დაუპირისპირდა. ოქრუაშვილის მსგავსად მსხალაძე წინა ფალავნობებზე, რომლის სამგზის პრიზიორიცაა, გორის სახელს იცავდა. სხვათა შორის, ქართულ ჭიდაობაში ხშირად იცვლიან გუნდებს და რაიონებს, რაც ჩვეულებრივ მოვლენად იქცა. ეს მოჭიდავეები 2006 წელს ფალავნობის ფინალში დაუპირისპირდნენ ერთმანეთს. მაშინაც და ახლაც 160 კილოგრამიანმა ხანჯალიაშვილმა 60 კილოგრამით მსუბუქ მსხალაძეს მოუგო.
მესამე ადგილისათვის აჭარის გუნდის წევრი ვახტანგ ზოიძე და თბილისელი თევდორე აბელაშვილი შეერკინენ, მართალია, აბელაშვილმა ტექნიკური ჭიდაობისათვის დიპლომი მიიღო, მაგრამ ვერაფერს გახდა ფიზიკურად ძალზე ძლიერ ზოიძესთან.
გადამწყვეტი ფინალური ორთაბრძოლა ერთობ თვალსასეირო და სანახაობრივად ეფექტური გამოდგა. ფინალი ხშირად დაძაბული და ილეთების კასკადით მცირეა, რასაც ვერ ვიტყოდით 2010 წლის ფინალურ ჭიდილში. ოქრუაშვილმა ძალზე ლამაზი და მძლავრი გდება შეასრულა, წმინდა გამარჯვებით შარშან პირველად მოპოვებული ფალავნობა წელს გააორა და ფალავნობა კიდევ ერთი წლით შეინარჩუნა.
საქართველოს ფალავნობა 2010 წელი.
1. ადამ ოქრუაშვილი (მცხეთა)
2. ზვიად ხანჯალიაშვილი (თელავი)
3. ვახტანგ ზოიძე (აჭარა).
თემურ გიორგაძე - ქართული ჭიდაობის ეროვნული ფედერაციის პრეზიდენტი:
- ერთი კვირაა, რაც ქართულ ჭიდაობაში ფედერაციის პრეზიდენტად მოვედი. ამ ფალავნობის ორგანიზაციაში და მის შემჭიდროებულ დროში მოწყობაში შესაძლოა ხარვეზებიც იყო, მაგრამ შეცდომებს შემდეგში აუცილებლად გავითვალისწინებთ და გამოვასწორებთ. მოგეხსენებათ წელიწადი იწურებოდა და ფალავნობა უსათუოდ უნდა ჩაგვეტარებინა.
16 მონაწილე შესაძლოა არ იყოს ბევრი, მაგრამ აქედან მოჭიდავეები იყვნენ ძლიერები და სანახაობაც შესანიშნავი გამოდგა.
გაბრიელ ბარჯაძე
