საქართველოს თავისუფალი სტილით მოჭიდავეთა ახალგაზრდულმა ნაკრებმა ორი ბრინჯაოთი დაასრულა თანატოლთა მსოფლიოს ჩემპიონატზე, რომელიც გუშინ დამთავრდა ფრანგულ მაიკონში. მსოფლიოს წლევანდელი პრიზიორები შმაგი თოდუა (60) და ტარიელ გაფრინდაშვილი (74) გახდნენ. გუნდურ ჩათვლაში ნაკრები მეექვსე ადგილზე გავიდა 29 ქულით. ამდენად, ამ გუნდმა მსოფლიოს შარშანდელ ჩემპიონატზე ნაჩვენები შედეგი - 1 ბრინჯაო კი გააუმჯობესა, თუმცა გამოსვლა მაინც ვერაა დამაკმაყოფილებელი. აღსანიშნავია, რომ ორივე მედალოსანი წლეულს ევროპის მესამე პრიზიორიც გახდა.
გიორგი გოგშელიძის გუნდმა ეს მედლები ტურნირის პირველ დღეს, შაბათს მოიპოვა, როცა თოდუა ნახევარფინალში გავიდა, გაფრინდაშვილი კი მეოთხედფინალში
შეიძლება ითქვას, ჩვენებურმა მეოთხედფინალში უპრობლემოდ მოუგო ინდოელ შარვან შარვანს - 5:3, მაგრამ ნახევარფინალში ვერაფერს გახდა თურქთა ევროპის ვიცე-ჩემპიონ სელიმ კოზანთან - 0:11. თოდუა მასთან ევროპის პირველობაზეც დამარცხდა, მაშინაც ამავე ეტაპზე და ასევე წმინდად - 1:12. კიდევ ერთი საინტერესო პარალელი ისაა, რომ კოზანი ამჯერადაც ვერცხლს დასჯერდა, თოდუამ კი ბრინჯაოსთვის შეხვედრაში ფრანგი ილმან მუხტაროვი დაძაბულ პაექრობაში 11:6 დაჯაბნა.
ბრინჯაოსთვის პაექრობა გაცილებით დაძაბული ჰქონდა თბილისელ გაფრინდაშვილს და შეიძლება, ითქვას, მარცხს სასწაულებრივად გადაურჩა. უფრო სწორად, მეტოქის, აზერბაიჯანელი მურად სულეიმანოვის ზედმეტმა თავდაჯერებამ გადაარჩინა - 9:0 უგებდა ჩვენებურს და წმინდა მოგებასთან ერთადერთი ქულა აშორებდა, მაგრამ ნაადრევად ირწმუნა გამარჯვება; თან ჩვენებურიც სათანადოდ არ შეაფასა, რის გამოც იოლად შეუშვა ილეთზე და გაფრინდაშვილმა ზურგსუკან გდებით ბეჭებზე დააწვინა!
არადა, მანამ თვითონ ქართველი ძლივს გადაურჩა „ტუშეს“, თუმცა კარგი დაცვა გამოავლინა და ხანგრძლივი ცოცვის შემდეგ გაექცა, მაგრამ რომ არა თავისივე შეცდომა, იქამდეც არ უნდა მიეყვანა საქმე: დასაწყისშივე სწორედ იმგვარი ზურგს უკან გდება დაუპირა, ზემოთ რომ ვახსენეთ.
გაფრინდაშვილმა ქვევით ჭიდობისას ხელები კარგად კი შეუკრა იღლიებში და გადასაგდებადაც წამოქაჩა, გადააგდო კიდეც, მაგრამ ილეთის ბოლომდე დასასრულებლად ძალა არ ეყო. ეს გდება სწორედ იმიტომაა სარისკო, რომ სათანადო ტექნიკასთან ერთად დიდ ძალას მოითხოვს და თუ კარგად არ გაქვს დამუშავებული, არც ღირს გარისკვად.
იმ ეპიზოდში გაფრინდაშვილსაც ისე დაემართა - სულეიმანოვმა დაუხურა ეპიზოდი და „ტუშეს“ არა, მაგრამ 4-ქულიან ფორას კი გამორჩა. როგორც გითხარით, მოგვიანებით მან ანგარიში 9:0-მდე გაზარდა, თუმცა ჩვენებურს მასთან ძველი ვალი ჰქონდა გადასახდელი - წლეულს ევროპის პირველობაზე სწორედ ამ აზერბაიჯანელთან დამარცხდა. ამიტომ ახლა როგორც კი დაიჭირა თავის საყვარელ ილეთზე, შანსი ხელიდან აღარ გაუშვა, ღირსეული რევანშიც აუღო და ეს მნიშვნელოვანი ამბავი უნაკლო მალაყითაც აღნიშნა.
გაფრინდაშვილი ძირითად ბადეში ამერიკელთა მომავალ მსოფლიოს ჩემპიონ ჯონ მარკ ჰალთან 1:12 დამარცხდა. მანამ ჩვენებურმა ფრანგი კარლეს ანდრე აფა 12:2, ხოლო თურქი მუჰამეტ ლუტფი ქუჩუკილდირიმი 7:6 დაჯაბნა, სანუგეშოში კი იაპონელ იაჯურო იამასაკის წმინდად, 10:0 მოუგო.
თუმცა რამდენადაც გაფრინდაშვილმა გაგვახარა 0:9-ზე მოპოვებული წმინდა გამარჯვებით, ზუსტად ასევე დაგვწყვიტა გული ევროპის კიდევ ერთმა წლევანდელმა ბრინჯაოს მედალოსანმა ზურაბ ურთაშვილმა (120) - ისიც 9:0 უგებდა თურქ ჰუსეინ მეჰმეთ ციველეკს, მაგრამ მეტოქემ ბეჭებზე დააწვინა. ჩვენებური აქაც რევანშისთვის იბრძოდა - ციველეკთან დამარცხდა წლევანდელ ევროპირველობაზე და ახლოსაც იყო მიზანთან... ჯერ მარტო ამდენი ქულის დაგროვება რად ღირს და ნამდვილად საცოდაობაა, როცა ასეთ უპირატესობას ანიავებ... არადა, ურთაშვილი გუშინ ქულების მოპოვების და შეტევის იშტაზე ნამდვილად იყო - პირველ შეხვედრაში ბელარუსი ვიტალი პისნიაკი 2:20 წუთში 11:0 დაამარცხა. დონდლო და მოუქნელ ბელარუსს თავიდან ფეხი კარგად გამოსდო გარედან და უკან 4-ქულიანზე გადაჩეხა.
ერთი ქულა მეტოქის დაუკმაყოფილებელი პროტესტისთვის მიიღო, თუმცა ეს არც სჭირდებოდა, რადგან პისნიაკთან ყველაფერი გამოსდიოდა - ფეხშიც თავისუფლად შევიდა და გადააგდო, ფეხებიდან ჯვარედინ მოვლებაზეც კარგად დაატრიალა და იქმნებოდა შთაბეჭდილება, რომ რასაც უნდოდა, იმას გაუკეთებდა. აკი საბოლოოდ იოლი გამარჯვებაც მოიპოვა, თუმცა არ შერჩა და მერე ვერც სანუგეშოში გადავიდა.
შაბათს ნახევარფინალში ჩვენი გუნდის კიდევ ერთი წევრი, ევროპის წლევანდელი ფინალისტი რობერტ დინგაშვილიც (50) გავიდა, თუმცა უმედლოდ დარჩა. ის ჯერ ყირგიზ ხურშიდ პარპიევთან დამარცხდა 9:4, დამამშვიდებლის ფინალში კი ყაზახ იერბულან სარკიტბაევთან 6:12 წააგო. მერვედფინალში დინგაშვილმა სომეხი არმან ანტონიანი 9:7, ხოლო იაპონელი რიო მაცუი 7:7-ზე დამატებითი მაჩვენებლებით დაამარცხა.
ჩვენი გუნდის სხვა წევრებიდან თითო შეხვედრა მოიგეს მექი სიმონიამ (69) და გივი მაჭარაშვილმა (96), რომლებმაც ერთნაირი ანგარიშით, სუფთად - 10:0 მოუგეს, შესაბამისად, კანადელ ტეივირ სინგ ბოალს და სლოვაკ გაბრიელ ტისცის. მომდევნო შეხვედრა სიმონიამ ამერიკელ ზაჰიდ ვალენსიასთან 2:13 დათმო, მაჭარაშვილი კი წმინდად დამარცხდა უნგრელ კრისტოფ ვიტმანთან.
კახა ირემაძე (55) და ევროპის კიდევ ერთი წლევანდელი ბრინჯაოს პრიზიორი გიორგი სულავა (66) პირველივე შეხვედრებში დამარცხდნენ, შესაბამისად, უკრაინელ ანდრეი იაცენკოსა და ამერიკელ ალეს უილიამ პანტალეოსთან.
50 კგ.
1. რიჩარდ სპენსერ ლეე (აშშ); 2. ხურშიდ პარპიევი (ყირგიზეთი); 3. იერბულან სარკიტბაევი (ყაზახეთი), ალიაბას რზაზადე (აზერბაიჯანი); 5. რობერტ დინგაშვილი (საქართველო).
55 კგ.
1. აფგან ხაჩალოვი (აზერბაიჯანი); 2. ხასანხუსეინ ბადრუდინოვი (რუსეთი); 3. გულომჯონ აბდულაევი (უზბეკეთი), დატონ დაიან ფიქსი (აშშ); 17. კახა ირემაძე (საქართველო).
60 კგ.
1. რეიმან ბიუკაგა ბიაბანი (ირანი); 2. სელიმ კოზანი (თურქეთი); 3. შმაგი თოდუა (საქართველო), კეზიკ ჩიმბა (რუსეთი).
66 კგ.
1. ენეს ვაჰიტ უსლუ (თურქეთი); 2. ახმედ უსმანოვი (რუსეთი); 3. ორხან აბასოვი (აზერბაიჯანი), იუჰი ფუჯინამი (იაპონია); 26. გიორგი სულავა (საქართველო).
74 კგ.
1. მარკ ჯონ ჰალი (აშშ); 2. აჰმად იუსეფ ბაზრიგალენი (ირანი); 3. ტარიელ გაფრინდაშვილი (საქართველო), ნიკიტა სუჩკოვი (რუსეთი).
84 კგ.
1. არსენ-ალი მუსალალიევი (რუსეთი); 2. ოსმან გოცენი (თურქეთი); 3. დზიანის კრამიანკოუ (ბელარუსი), გაჯიმურად მაგომედსაიდოვი (აზერბაიჯანი).
96 კგ.
1. ჰოსეინ ლოტფალი შაჰბაზიგაზვარი (ირანი); 2. ერიკ სვენ ტილე (გერმანია); 3. კრისტოფ ვიტმანი (უნგრეთი), ზნაურ კოჩიევი (რუსეთი); 11. გივი მაჭარაშვილი (საქართველო).
120 კგ.
1. ყაზბეგ ხუბულოვი (რუსეთი); 2. უმარ ისრაილოვი (აზერბაიჯანი); 3. ჰუსეინ მეჰმეტ ციველეკი (თურქეთი), ამირ რეზა მოჰამად ჯაფარ ამირი (ირანი).
ყოველდღიური სპორტული გაზეთი "ლელო"
