ივან ფატიჩი: საქართველოში ჩემი ქვეყნის მსგავსი ცხოვრებაა... განსაკუთრებით ხინკალი და ხაჭაპური მომეწონა

Sportall.ge აგრძელებს რუბრიკას - "გაიცანი სპორტსმენი სხვა კუთხით", სადაც დღეს "სამტრედიის" მცველ ივან ფატიჩს წარმოგიდგენთ.

29 წლის ფეხბურთელი ქართულ კლუბს ზამთრის სატრანსფერო ფანჯრის პერიოდში შეუერთდა, კარიერის განმავლობაში კი მილანის "ინტერშიც" კი ირიცხებოდა.

ვფიქრობთ, საინტერესო უნდა იყოს მონტენეგროელი მცველის ცხოვრება მოედანს მიღმა.

- როგორია თქვენი ცხოვრება საქართველოში?
- ჩემი ცხოვრება ფეხბურთია, შემდეგ კი, რა თქმა უნდა, ოჯახი.

- როგორ შეეგუეთ ჩვენს ქვეყანას?
- ადვილად, იმიტომ, რომ აქ ჩემი ქვეყნის მსგავსი ცხოვრებაა.

- სად ცხოვრობთ, სამტრედიაში თუ თბილისში?
- ამჟამად ჩემს ოჯახთან ერთად თბილისში ვცხოვრობ, მაგრამ მალე სამტრედიაში გადავალ.

- როდესაც "ინტერში" ირიცხებოდით, გუნდის მწვრთნელი რობერტო მანჩინი იყო. რას გვეტყოდით მის შესახებ?
- იმ დროს ძალიან ახალგაზრდა ვიყავი, ამიტომ მწვრთნელს არცთუ ისე ბევრს ვესაუბრებოდი. მას ძალიან ბევრს ვუსმენდი და მანჩინის ჩემთან ძალიან კარგი დამოკიდებულება ჰქონდა.



- რა მოგეწონათ ყველაზე მეტად საქართველოში?
- ყველაზე მეტად საჭმელი მომეწონა. გამოვარჩევდი - ხინკალსა და ხაჭაპურს.

- საქართველო თუ დაათვალიერეთ?
- სამწუხაროდ, ამისთვის დრო არ მქონდა, მაგრამ ამას ნამდვილად ვაპირებ.

- რა შეგიძლია გვითხრათ ქართველი ხალხის შესახებ?
- ქართველებს ძალიან კარგი და მეგობრული ხალხი გყავთ.

- თუ ისწავლეთ რამდენიმე ქართული სიტყვა?
- სამწუხაროდ, არა... ქართული ჩემთვის ძალიან რთულია, ამიტომ იტალიურად და ინგლისურად ვსაუბრობ.

- გუნდში რაიმე ზედმეტსახელი თუ გაქვთ?
- არა (იცინის). ყველა ივანს მეძახის.



- ვინ მოიგებს ჩემპიონთა ლიგას?
- მადრიდის "რეალი".

- თქვენი საყვარელი გუნდი რომელია?
- რომის "ლაციო".

- რატომ?
- აქ ორი ჩემი ფავორიტი ფეხბურთელი - სინიშა მიხაილოვიჩი და დეიან სტანკოვიჩი თამაშობდა.

- რა გსმენიათ ქართველი ლეგენდის, კახი კალაძის შესახებ, რომელიც სამტრედიელია?
- ვიცი, რომ ის იტალიაში თამაშობდა და მის შესახებ ბევრი მსმენია. სამწუხაროდ, შეხვედრის საშუალება არ მომცემია.

- რა შეგიძლიათ გვითხრათ თქვენი ოჯახის შესახებ?
- ოჯახი ჩემთვის ყველაფერია. ის ჩემთვის პირველიცაა და უკანასკნელიც.



- რა არის ივან ფატიჩის ამბიცია?
- ჩემი მიზანია, ვითამაშო კარგი ფეხბურთი. მთელი ჩემი ოჯახი ფეხბურთს თამაშობდა და სხვა უფლება არც მაქვს.

- საფეხბურთო კარიერის დასრულების შემდეგ საქართველოში ცხოვრებაზე თუ დაფიქრდებოდით?
- ეს, პირველ რიგში, ღმერთის ნებაა. ის გადაწყვეტს, თუ სად ვიცხოვრებ მე. არ მინდა, ვიფიქრო, რა იქნება ხვალ თუ ზეგ, ვცხოვრობ დღევანდელი დღით.

- რომელიმე ქართული სიტყვა თუ შეგიძლიათ გაიხსენოთ, რაც განსაკუთრებით გეუცნაურათ?
- სიმართლე გითხრათ, ჩემთვის ყველა სიტყვა უცნაურია და ვერცერთს გამოვარჩევდი (იცინის).

- ვინ არიან თქვენი ფავორიტი მცველები?
- სინიშა მიხაილოვიჩი და ფილიპ მექსესი. ისინი ძალიან ძლიერი ფეხბურთელები იყვნენ და თავიანთ მაქსიმუმს აკეთებდნენ.

- თუ ფეხბურთელი არ იქნებოდით, სად წარმოგიდგენიათ თქვენი თავი?
- სიმართლე გითხრათ, არ ვიცი... მაგრამ ალბათ, ისიც კავშირში სპორტთან იქნებოდა.

- რომელი იყო თქვენი კარიერის ყველაზე ემოციური თამაში?
- პირველად, როდესაც სერია ა-ში ვითამაშე.



- ვინ არის ყველაზე სახიფათო და ძლიერი ფეხბურთელი, ვისთან ერთადაც გითამაშიათ?
- არ ვიცი, რატომ, მაგრამ ვფიქრობ, რომ ასეთი მარკო მატერაცია.

- ვინ არის საუკეთესო ფეხბურთელი, ვის წინააღმდეგაც გითამაშიათ?
- ეს ხავიერ პასტორეა, როდესაც ის "პალერმოში" ირიცხებოდა.

- რომელია თქვენი საყვარელი ფილმი?
- "გლადიატორი".

- როგორ მუსიკას უსმენთ?
- თამაშის დაწყებამდე მხოლოდ სერბული მუსიკა მაქვს ჩართული.

- რომელი სპორტი მოგწონთ ყველაზე მეტად ფეხბურთის შემდეგ?
- ძალიან მიყვარს ჩოგბურთი, საყვარელი ჩოგბურთელი კი ნოვაკ ჯოკოვიჩია.

▶ 14 კლუბი 10 წელში - ვინ არის "სამტრედიის" ახალწვეული, რომელიც "ინტერში" თამაშობდა
▶ ივან ფატიჩი: თავიდან "სამტრედიას" უარი ვუთხარი, თუმცა შემდეგ...