ლეგიონის უქმეები: გიორგი ჩაკვეტაძე დაბრუნდა [VIDEO]

ბელეკში შეკრებაზე მყოფმა "შტურმმა" ამხანაგურ მატჩში პოლონეთის "ლეხს" 2:1 სძლია.

ამ შეხვედრაში გრაცელთა გუნდის ძირითად შემადგენლობაში იყო ნახევარმცველი ოთარ კიტეიშვილი, რომლის საგოლე პასით ანგარიში 2:0 გახდა.


ბელგია
ბელგიის ჩემპიონატის 23-ე ტურში "გენტმა" სტუმრად "კორტრიკი" 2:1 დაამარცხა.

მწვრთნელმა იეს ტორუპმა თავდამსხმელი გიორგი ქვილითაია განაცხადში არ შეიყვანა, ნახევარმცველი გიორგი ჩაკვეტაძე კი 68-ე წუთზე შეუშვა შეცვლაზე (სპეციალური სამუხლით ითამაშა), როდესაც ანგარიში 1:1 იყო. 77-ე წუთზე კი დე სმეტმა ჩაკვეტაძის პასი მიიღო, საჯარიმოში შეიჭრა და ულამაზესი დარტყმით გამარჯვების გოლი გაიტანა.


ხორვატია
გიორგი მჭედლიშვილის "გორიცა" ამხანაგურ შეხვედრაში ლუბლიანის "ოლიმპიას" 1:1 დაუზავდა.

კვიპროსი
კვიპროსის ჩემპიონატის მე-18 ტურში ქართველების "ანორთოსისი" ლარნაკის "აეკს" ესტუმრა და 0:3 დამარცხდა. ორივე ქართველი სათადარიგო იყო, ბექა მიქელთაძე მოედანზე 67-ე წუთზე გამოჩნდა, ხოლო ნიკა კაჭარავა 82-ე წუთზე ჩაერთო შეხვედრაში. "ანორთოსისი" მეექვსე ადგილზეა.

დანია
საბა ლობჟანიძის "რანდერსი" ამხანაგურ შეხვედრაში ჩეხურ "სლოვაცკოსთან" 0:1 დამარცხდა.

პოლონეთი
გიორგი მერებაშვილის "პლოცკი" ამხანაგურ შეხვედრაში ჩინურ ჰენან ჯიანიეს 1:1 დაუზავდა.

შეკრებაზე მყოფმა სოსნოვიეცის "ზაგლებიემ", რომელშიც ახლახან ნახევარმცველი გიორგი ივანიშვილი და თავდამსხმელი გიორგი გაბედავა ჩაირიცხნენ, ჩეხეთის რანგით მეორე ლიგის "ზნოიმო" 4:2 დაამარცხა.

ორივე ჩვენებური ძირითად შემადგენლობაში იყო. გაბედავამ შესვენებამდე ითამაშა და ჰეთ-თრიკი შეასრულა, ხოლო ივანიშვილმა შეუცვლელად იასპარეზა.

უკრაინა
სანდრო კობახიძისა და ანდრო გიორგაძის პოლტავის "ვორსკლა" ამხანაგურ შეხვედრაში სერბულ "მლადოსტს" დაუპირისპირდა და 1:0 დაამარცხა.

შვედეთი
გიორგი ხარაიშვილის "გიოტებორგი" ამხანაგურ შეხვედრაში ნორვეგიულ "ოდს" დაუპირისპირდა და 2:1 გაიმარჯვა. ქართველი ფეხბურთელი ძირითად შემადგენლობაში იყო, მე-5 წუთზე პენალტი გაიტანა და 88-ე წუთზე შეცვალეს.

რუსეთი
აბუ-დაბიში შეკრებაზე მყოფმა "კრილია სოვეტოვმა" უკვე ორი საკონტროლო მატჩი ჩაატარა - სლოვაკეთის "ჟილინა" და ლატვიის "რიგა" ერთნაირი ანგარიშით, 1:0 დაამარცხა.

მწვრთნელმა მიოდრაგ ბოჟოვიჩმა ორივე შეხვედრაში პირველ და მეორე ტაიმში სხვადასხვა შემადგენლობა გაიყვანა მოედანზე და ნახევარმცველი ჯანო ანანიძე ორივეჯერ სასტარტოში დააყენა.