"ლა ლიგაში" თამაში, ესპანეთსა და საქართველოს შორის სხვაობა, თოკო შენგელია და ბასკეთი - ინტერვიუ გიორგი გაგუასთან

ევროპის ტოპ-ჩემპიონატში ქართველის გამოჩენა ყოველთვის სასიხარულოა. 20 წლის ქართველი შემტევი გიორგი გაგუა ახალი სეზონისთვის "ალავესის" ძირითად გუნდთან ერთად ემზადება, sportall ფეხბურთელს ესპანეთში დაუკავშირდა და მის ირგვლივ არსებულ სიტუაციაზე ესაუბრა.

- ჩემი საფეხბურთო კარიერა 4-5 წლის ასაკში დაიწყო, სათამაშოდ "ჩემპიონში" მივედი, სადაც მწვრთნელად ოთარ კორინთელი დამხვდა. აქედან ავიდგი ფეხი. რაც შეეხება ასაკობრივ ნაკრებს, პირველად იქ ასპინძელაშვილის თავკაცობის დროს 15-წლამდელთა გუნდში გამომიძახეს.

- საქართველოდან 15 წლის ასაკში წავედი. მაშინ ესპანეთში პირველად ჩამოვედი, სადაც 1-კვირიანი შერჩევები "ალავესში" გავიარე. სირთულეები, რა თქმა უნდა, უამრავი დამხვდა, პირველ რიგში, ენის ბარიერი, ასევე ის ფაქტი, რომ შევიცვალე გარემო, სადაც გავიზარდე, ბავშვობა გავატარე, საქართველოში კი ჩემი ოჯახი და მეგობრები დავტოვე.

- ვფიქრობ, ესპანეთი ჩემთვის საუკეთესო ვარიანტია, რათა განვვითარდე და პროფესიონალურ ფეხბურთამდე სწრაფად მივიდე, რასაც ვთვლი, რომ ძალიან სწრაფად მოხდა, ამით ბედნიერი ვარ.

- უშუალოდ ბავშვთა ფეხბურთში არ ვიცი, რადგან მე იქ არ მომიწია ყოფნა, მაგრამ ჩემი აზრით, პირველ რიგში, მიდგომასა და ბავშვების დამოკიდებულებაში იქნება. ესპანეთში თვითონვე გეუბნებიან, რომ მთავარია, შენ იყო საუკეთესოდ, რათა შემდეგ ჩვენც კარგად ვიყოთო. როდესაც შენი გაწვრთნილი ბავშვი წარმატებას აღწევს, რა თქმა უნდა, სასიხარულოა. ვფიქრობ, აქ ისეთი მენტალიტეტი აქვთ, რომ არ სჭირდებათ რაღაცის გამო მეორე რაღაცის გაკეთება, თვითონვე ბავშვობიდან აქვთ მიზანი, რასაც ბოლომდე მიჰყვებიან; ხოლო მეორე ნაწილს, ვისაც სურვილი აღარ ექნება, შუა გზაში ტოვებს და სწავლას აგრძელებს. საქართველოში ყველაზე დიდ როლს მენტალიტეტი თამაშობს, რადგან ხშირია, რომ  ნებდებიან, არ დებენ თავს, არ იცავენ წესებს, აქ კი ყველაფერი გაცნობიერებული აქვთ, როდესაც ამბობენ, რომ უნდათ ფეხბურთელობა, იციან, თუ რა დათმობაზე მოუწევთ წასვლა და რამდენი შრომა იქნება საჭირო იმისთვის, რომ წარმატებული გახდნენ. ვფიქრობ, სწორედ ამით არიან ესპანელები წინ, ცდილობენ მეტი და მეტი გააკეთონ და ელემენტარულზე არ დაკმაყოფილდნენ. შეიძლება იფიქროთ, რომ აკადემიების ბრალიაო, მაგრამ არა, თბილისშიც გვაქვს მშვენიერი აკადემიები, მაგალითად, "დინამო", "საბურთალო" და "ლოკომოტივი". გარკვეულ ასაკში წარმატებას რომ მიაღწევენ, შემდეგ ბევრი თავს ანებებს ან წყვეტს პროგრესირებას, რაც ჩემთვის ამოუხსნელია.

- ესპანეთში ყოფნის დროს აღმოვაჩინე, რომ აქ ყველა პატარა დეტალს დიდ ყურადღებას ანიჭებენ. რა თქმა უნდა, შრომას არავინ გიკარგავს და აბსოლუტურად ყველაფერი გიფასდება. ვფიქრობ, ეს ერთ-ერთი განსხვავებაა იმისა, რამაც შეიძლება ქართული ფეხბურთი ისე ვერ განავითაროს, როგორც ესპანური.

- გასულ სეზონს ბოლომდე დადებითად ვერ შევაფასებ, რადგან გუნდი დაქვეითდა. რაც შეეხება პერსონალურად ჩემს სეზონს, სიმართლე გითხრათ, მოლოდინს გადააჭარბა, რადგან დასაწყისში თავიდან მე-3 გუნდში უნდა მეთამაშა, პრე-სეზონის დროს კი მეორე გუნდთან ერთად ვივარჯიშე. სწორედ მანდ მოვეწონე მწვრთნელებს და მეორე გუნდში თამაშის შესაძლებლობა მომცეს. მიხარია, რომ გუნდის ბომბარდირი გავხდი და თამაშების მოგებაში ჩემი წვლილი შევიტანე.

- მინდორზე საუკეთესო პოზიცია, რა თქმა უნდა, თავდამსხმელია, რადგან მოედანზე გოლის გატანა ბავშვობიდან მოყოლებული ძალიან მიყვარს.

- თვითონ ალავესი ძალიან ტრადიციული კლუბია, ეს გუნდი ქალაქში ყველას ძალიან უყვარს. თამაშის დღეს ჩვეულებრივი ფიესტა გახლავთ, ასე ეძახიან აქ ზეიმს და ამ ყველაფერში მთელი ქალაქია ჩართული. რაც შეეხება აკადემიას, ვფიქრობ, ძალიან კარგია, გამოცდილი და ყურადღებიანი მწვრთნელებიც, რომლებიც ბავშვების მაქსიმალური განვითარებისთვის ყველაფერს აკეთებენ.

- თოკოს ქალაქში რამდენჯერმე შევხვდი. აქ მას აღმერთებენ. თავისუფლად შემიძლია გითხრათ, რომ შენგელია აქ გაკერპებული ჰყავთ, ძალიან უყვართ; მეტიც, ჩემი აზრით, ვიტორიაში ყველა ქართველი უყვართ, რაც დიდწილად სწორედ თოკოს დამსახურებაა.

- ელემენტარულებს თუ არ ჩავთვლით, როგორიცაა გამარჯობა, მადლობა და მსგავსი სიტყვები, ბასკური ენა ჯერ არ მისწავლია... როგორც ვიცი, საკმაოდ რთული ენაა, თუმცა შესაძლოა ესეც მასწავლონ.

- დიახ, სადებიუტო გოლი გავიტანე, რამაც ძალიან გამახარა, რადგან, ვფიქრობ, რომ ეს გოლი ჩემს კარიერაში გარდამტეხი იქნება. რაც შეეხება მწვრთნელს, თამაშის შემდეგ ის მოვიდა და გოლის გატანა მომილოცა, ასევე, კარგად თამაში დამიფასა და შემაქო, რამაც ერთიორად აღმაფრთოვანა.

- კლუბში თამაშთან დაკავშირებით არაფერს მეუბნებიან, თუმცა იმედი მაქვს, რომ ლა ლიგაში თამაშის შანსი მომეცემა, რათა თავი იქაც გამოვიჩინო. გუნდთან კონტრაქტი 2024 წლამდე მაკავშირებს, ეს კი იმას ნიშნავს, რომ მენდობიან და მე ჩემი მხრიდან იმედების გასამართლებლად ყველაფერს ვიზამ.

- ძირითად გუნდში ჩემი მთავარი კონკურენტები იონ გუიდეტი, ხოსელუ, ტაიჩი და ლუკას პერესი არიან, მაგრამ დიდი ალბათობით, ხოსელუ და პერესი გუნდს დატოვებენ. ამიტომ დიდი იმედი მაქვს, რომ თავის გამოჩენის შანსი მომეცემა, ამისთვის კი მე ყველაფერს გავაკეთებ.

- დიდი სიამოვნებით ვითამაშებდი გვარდიოლას გაწვრთნილ გუნდში, რადგან "ბარსელონა" იმ პერიოდში ძალიან მომწონდა და ვთვლი, რომ პეპი ერთ-ერთი საუკეთესო სპეციალისტია.

- გიორგი გაგუას ერთი დღე მარტივია, დილით ვიღვიძებ, თავს ვიწესრიგებ, ვსაუზმობ. თუ ორჯერადი ვარჯიში გვაქვს, მაშინ ვარჯიშზე მივდივარ. უკან დაბრუნებულს სადილი გვაქვს. გარკვეული პერიოდის შემდეგ დასვენება იწყება. მეორე ვარჯიში თუ გვაქვს, მივდივართ იქ, უკან ვბრუნდები, ვვახშმობ. შემდეგ უკვე ძილის დროც მოდის. რაც შეეხება დასვენების დღეს, ხშირად მეგობრებთან ან გუნდელებთან ერთად ქალაქში გავდივარ და ვსეირნობთ. თავისუფალ დროს კი მეგობრებთან, ოჯახთან და საყვარელ ადამიანებთან საუბარში ვატარებ. ასევე მიზიდავს playstation-ის თამაში და წიგნების კითხვა. თავისუფლად შემიძლია ვთქვა, რომ ყველაფერს ვასწრებ.

- ბოლო პერიოდში 21-წლამდელებში ორჯერ გამომიძახეს. უბრალოდ, პირველ გამოძახებაზე გუნდმა ოფიციალურად ნაკრების ხელმძღვანელობას სთხოვა, რომ დავრჩენილიყავი, რადგან წინ მნიშვნელოვანი თამაშები გვქონდა, ნაკრებში კი ამხანაგური შეხვედრა იყო. მაშინ რამაზ სვანაძემ (ნაკრების მწვრთნელმა) უფლება მომცა, დავრჩენილიყავი და გუნდთან ერთად მეთამაშა, რისთვისაც დიდ მადლობას ვუხდი. მეორე გამოძახებაზე ისრაელში უნდა წავსულიყავით, რათა ამხანაგური შეხვედრები ჩაგვეტარებინა, თუმცა მაშინ ისრაელში არსებული რთული პერიოდი დაემთხვა და ვეღარ წავედით.

- ხვიჩას 9-10 წლიდან ვიცნობ და ყოველთვის ჰქონდა ის სურვილი, რომ პროფესიონალური ფეხბურთი ეთამაშა და საუკეთესო ყოფილიყო. ვთვლი, რომ კვარამ ეს ყველაფერი შეასრულა და ასრულებს კიდევაც. განსხვავება - გარეგნულად შეიცვალა, დანარჩენი ყველაფერი იგივეა, მაგალითად, თამაშის სტილი, ადამიანობა...

- ჰობი playstation-ის თამაში, მეგობრებთან ერთად ყოფნა, წიგნის კითხვა გახლავთ. სწავლით ჯერ ესპანურს ვსწავლობ, კი ვიცი უკვე, თუმცა საჭიროა კონკრეტული დონის დახურვა, რასაც სექტემბერში გამოცდის მეშვეობით გავაკეთებ. ასევე მინდა განვაგრძო სწავლაც...

- მიყვარს 90-იანების მუსიკა, რაც დიდწილად ჩემი მშობლებიდან გამომდინარეობს, რადგან მთელი ბავშვობა მათ ვუსმენდი. საყვარელი მუსიკოსი ამერიკელი რეპერი "2 pac" გახლავთ. რაც შეეხება ჟანრს, მხიბლავს ჯაზიც, ჰაუსიც. მოკლედ რომ გითხრათ, ყველაფერს ვუსმენ, რაც მომწონს.

- ჩემთვის საყვარელი წიგნი შერლოკ ჰოლმსის თავგადასავალია. ფილმს ვერ გამოვარჩევ, თუმცა უპირატესობას "ფორსაჟს" მივანიჭებ. სერიალებს დიდად არ ვუყურებ.

- ფეხბურთი არავის შეუყვარებია, ბავშვობიდან მე თვითონ ძალიან მიყვარდა, თუმცა მამაჩემი ყველაფერში გვერდში დამიდგა და ჩემს ამ წარმატებაში ლომის წილი დაიდო... რაც შეეხება ბავშვობის საყვარელ ფეხბურთელს - რონალდინიო გახლავთ.

- ევრო 2020 ძალიან მომეწონა. ვფიქრობ, თავი ისეთმა გუნდებმა გამოიჩინეს, რომლებიც, ბევრს არ ეგონა, რომ წარმატებას მიაღწევდნენ. თავისუფლად შემიძლია გითხრათ, რომ ყველა თამაში დაძაბული იყო. რაც შეეხება გამარჯვებულს, უძლიერესმა გაიმარჯვა, იტალიამ ევრო 2020-ის თასი თავისი უძლიერესი დაცვითა და კრეატიული შეტევით დაიმსახურა. მინდა 2 ფეხბურთელი გამოვყო - მეკარე ჯანლუიჯი დონარუმა და ტურნირის აღმოჩენა კიეზა (მიუხედავად იმისა, რომ "იუვენტუსში" გამოანათებდა ხოლმე, ასეთ დონეზე ჯერ არ უთამაშია).

ცენტფორვარდი ნაკრებისთვის - გაგუამ ლა ლიგის გუნდში სადებიუტო გოლი გაიტანა [VIDEO]