ქეცბაიას წარმატების გასაღები, საკადრო რესურსი და მნიშვნელობა საქართველოს ნაკრებისთვის

თემურ ქეცბაია სანაკრებო მოღვაწეობას დაუბრუნდა. 54 წლის სპეციალისტი საქართველოს ნაკრებს 2009-14 წლებში წვრთნიდა და ამ მიმართულებით 8-წლიანი პაუზა გამოუვიდა.

საქართველოს ნაკრების გამორჩეულმა ფეხბურთელმა მშობლიური ნაკრები მაშინ ჩაიბარა, როცა სახელოვანი არგენტინელი მწვრთნელის, ექტორ რაულ კუპერის ხანაში "ჯვაროსნებს" ხანგრძლივი მოუგებელი სერია ჰქონდა. ეს მაშინ მთავარი სულაც არ იყო, გუნდს თითქოს ერთიანობა, საკმარისი მობილიზება და წარმატებისკენ სწრაფვა აკლდა. თემურმა ამ მხრივ ყველაფერი მალევე მოაგვარა და ნაკრებში ჯანსაღ სიტუაციასა და წაუგებელ სერიას მიაღწია. იყო ბოლო წუთებში იღბლიანობის მომენტებიც, თუმცა, შემთხვევით არავის უმართლებს.

ხორვატიის ნაკრები თბილისში ლევან კობიაშვილის გოლით (1:0) რომ დავამარცხეთ, ამ დაპირისპირებაში ქეცბაიას მაღალი კლასი გამოჩნდა - მეორე ტაიმში სწორი ცვლილებებითა და თამაშის წარმართვით თემურმა ვიზავი სლავენ ბილიჩი სრულად დაჯაბნა.

სამწუხაროდ, ეს შეხვედრა აღმავლობის ერთგვარად ბოლო წერტილი აღმოჩნდა. ამის შემდეგ გუნდში კონფლიქტებმა და ცუდმა შედეგებმა იმატა. თუკი მანამდე სათამაშო სტილს ამხელა მნიშვნელობას არ ვანიჭებდით, უკვე ამბიცია გაჩნდა, რომ ნაკრებს მხოლოდ ყრუ დაცვიდან არ ეთამაშა. გარდა ამისა, როცა საქმე შეტევას ეხებოდა, მას თითქოს ისე გადავეჩვიეთ, ჩვენზე სუსტ მეტოქეებთანაც გვიჭირდა. საბოლოოდ, ყველაფერი გულისტკენით დასრულდა - პოლონეთთან თბილისში მწარე მარცხი (0:4) და ქეცბაიას სანაკრებო ამბებს წერტილი დაესვა.




თემურის ახალ გამოწვევას, კვიპროსის ნაკრებს, ბოლო წლებში ევროპაში ერთ-ერთი ყველაზე დიდი რეგრესი აქვს. ამ ქვეყნის კლუბები უფრო მეტ წარმატებას აღწევენ, ვიდრე ეროვნული ნაკრები. შეგვიძლია ერთგვარი პარალელები გავავლოთ იმდროინდელ საქართველოს ნაკრებთან, რომელიც თემურმა ჩაიბარა, თუმცა მაშინ "ჯვაროსნებში" გაცილებით მაღალი დონის ფეხბურთელები გამოდიოდნენ.

მუნდიალის უკანასკნელ შესარჩევ ეტაპზე კვიპროსელებმა იმდენივე ქულა (5) დააგროვეს, რამდენიც უსუსტესმა მალტამ. ქართველი მწვრთნელის მომავალმა ნაკრებმა C ლიგაში ადგილის შენარჩუნება პლეი-აუტის გზით მოახერხა, თუმცა ივნისის შეხვედრები საშინლად ჩაატარა, გოლების გატანა მხოლოდ ჩრდ. ირლანდიასთან მოახერხა და 2 ქულა აქვს.

ახლა კვიპროსელ გულშემატკივარსაც იმის იმედი ექნება, ქეცბაია გუნდს ბრძოლისუნარიანს გახდის, რომელთანაც ქულებს იოლად ვერავინ დაგეგმავს.

ქეცბაიას ნაკრებში "იუვენტუსის" ფეხბურთელი ეყოლება, რომელიც გასულ სეზონში "სალერნიტანაში" გამოდიოდა. გრიგონის კასტანოსი 24 წლისაა და ფორვარდის პოზიციაზე თამაშობს, თუმცა გოლი ბოლოს მიმდინარე წლის დასაწყისში, 9 იანვარს, "ვერონას" კარში გაიტანა, ერთხელ კი შედეგიანი პასი (ასევე კლუბში) ჰქონდა.

ქეცბაიას ყოფილ კლუბ "ანორთოსისიდან" ნაკრებში ვეტერან შემტევს, 33 წლის დიმიტრიოს ქრისტოფს იწვევდნენ, თუმცა ნაკრებში მას თავის გამოჩენა უჭირს. ამ გუნდიდან ნაკრების სტაჟიანი წევრია 29 წლის მცველი კოსტაკის არტიმატასიც.

ქართველ სპეციალისტს მოქმედ ჩემპიონ "აპოლონისა" და "ომონიას" რამდენიმე მოთამაშეზე დაყრდნობა შეუძლია. რაც შეეხება ლეგიონერებს - გუნდში ერთ-ერთი ყველაზე გამოცდილი ლიეჟის "სტანდარტის" უკანახაზელი, 29 წლის კონსტანტინოს ლაიფისია.

ქეცბაია აუცილებლად გაზრდის კონტინგენტს და ნდობას გამოუცხადებს ფეხბურთელებს, რომლებიც ეროვნულ ნაკრებში აქამდე ვერ ხვდებოდნენ. რისი მაგალითები საქართველოს ნაკრებშიც გვქონდა.

ერთა ლიგის C დივიზიონის იმ ჯგუფში, სადაც კვირპოსის ნაკრები გამოდის, პირველადგილოსნის ბედი უკვე გარკვეულია - საბერძნეთის ნაკრებს ვერავინ აჯობებს. ახლა მთავარი ისაა, როგორ გადანაწილდება ქულები სხვა ჯგუფებში და ნახევარფინალური წყვილები შედგება. შეგახსენებთ, ამ დროის მდგომარეობით, საქართველოს ნაკრებს "ერთა ლიგის" პლეი-ოფში სწორედ საბერძნეთის ნაკრებთან სტუმრად დაპირისპირება ელის. ასე რომ, ახლა ძალიან მნიშვნელოვანია, ბერძნებმა ქულები დაკარგონ, თანაც იმ ფონზე, როცა ჯგუფიდან გასვლის საკითხი მოგვარებული აქვთ.

ამ ყველაფრისკენ პირველი გზა ქეცბაიას კვიპროსის ნაკრებზე გადის - ისინი 24 სექტემბერს ლარნაკაში დაუპირისპირდებიან. თემურისთვის ამ მატჩს დიდი მნიშვნელობა აქვს - პრინციპულ მეტოქესთან წარმატებით დაწყება უმნიშვნელოვანესი იქნება. თავის მხრივ, შესაძლოა, შანსი საქართველოს ნაკრებსაც მისცეს, ჯგუფიდან ბერძნებზე მეტი ქულით გავიდეს.

3 დღის შემდეგ ქეცბაიას ნაკრები "ერთა ლიგას" კოსოვოში დაასრულებს, ამის შემდეგ კი ევროპის ჩემპიონატის შესარჩევი ეტაპის წილისყრას დაელოდება.

შოთა არველაძე თემურ ქეცბაიას კვიპროსის ნაკრებში დანიშვნას ეხმაურება

საქართველოს ნაკრების სავარაუდო მეტოქეები ევროპის ჩემპიონატის გზაზე - ყველაფერი "ერთა ლიგაზე"