სამტრედია-დილა 5:0 - ჩემპიონი კოშმარში [VIDEO]

ქართულ ფილმ "ქვევრში" ეროსი მანჯგალაძის გმირი ამბობს - "მე ღმერთი არ ვარ, სასწაული მოვახდინო - სამჭკუაშვილი ვარო"!

სამჭკუაშვილმა არა, მაგრამ სამტრედიელებმა სწორედ ეროსი მანჯგალაძის სახელობის სტადიონზე მიმდინარე ჩემპიონატის ერთგვარი სასწაული შემოგვთავაზეს - საქართველოს მოქმედი ჩემპიონი და სატურნირო ცხრილის ამმატჩამდელი ლიდერი 5 უპასუხო გოლით დაამარცხეს.

ამ ანგარიშით გორელების ძლევას, ალბათ, ყველაზე ოპტიმისტი სამტრედიელი გულშემატკივარიც ვერ იფიქრებდა. აღნიშნული ანგარიშით კი არა, ეროვნულ ჩემპიონატში "დილას" 5 მარტის შემდეგ (ბათუმის "დინამოსთან" 0:1) არ წაეგო.

საგულისხმოა ისიც, რომ გორელებს აქამდე მხოლოდ ერთი ბურთი ჰქონდათ გაშვებული განვლილ 6 ტურში და ახლა ერთბაშად ხუთი მიიღეს.

სხვათა შორის "სამტრედიასთან" რომელიმე გოლში ალექსეი შევჩენკოს დადანაშაულებაც ძნელია, პირიქით - მან რამდენჯერმე გადაარჩინა კიდეც თავისი გუნდი, ხოლო "დილას" სხვა არცერთი სათამაშო რგოლი ნორმალურად არ გამოიყურებოდა. მიუხედავად იმისა, რომ დისკვალიფიცირებული უჩა სოსიაშვილი თამაშს ტრიბუნიდან ადევნებდა თვალს, მატჩს ინტრიგას მისი და გია ცეცაძის, ანუ ორი ახალგაზრდა სპეციალისტის პაექრობაც მატებდა.

ცეცაძემ, რომელსაც ადრე "დილაშიც" წარმატებით უმუშავია, ამჯერად იმარჯვა, თუმცა ამ შეხვედრით მათ შორის უპირატესობაზე სრულფასოვანი დასკვნების გაკეთება შეუძლებელი გვგონია...

მასპინძლები თავიდანვე სწრაფ ტემპში აგორებდნენ ბურთს, შეტევებს სწორხაზოვნად არ წარმართავდნენ და გორელთა უკანა ხაზში სივრცეების მოძებნას სხვადასხვა მიმართულებიდან ცდილობდნენ. ვიდრე "დილას" დაცვის ხაზის ჩავარდნები ქრონიკულ სახეს მიიღებდა, ჯერ სამტრედიელ უკანახაზელებს უჭირდათ. თავიდან მათ ოთარ მარცვალაძის, ხოლო შემდეგ გუგა ფალავანდიშვილის რეიდები ვერ შეაჩერეს და კინაღამ დაისაჯნენ კიდეც...

თუმცა ცოტა ხანში იქით დასაჯეს მეტოქე. მე-12 წუთზე გრძელი, მოზომილი პასით ბუდუ ზივზივაძე აღმოჩნდა სახეირო პოზიციაზე და ანგარიში გახსნა - 1:0.

დაწინაურებულმა მასპინძლებმა უფრო თამამად შეუტიეს. ათ წუთში მოედნის ცენტრში სტუმართა მიერ დაშვებულ უხეშ შეცდომას დავით ჯიქიას მეკარესთან პირისპირ გასვლა მოჰყვა, მაგრამ მან იქამდე ვერ დაარტყა, ვიდრე ხელი არ შეუშალეს.

29-ე წუთზე, გორელთა მორიგი შეცდომის შედეგად, ავთო ენდელაძე გავიდა პირისპირ, თუმცა ბურთი კარისკენ ზუსტად ვერ გაგზავნა. არაზუსტი იყო ირაკლი სიხარულიძეც, რომელიც სამტრედიელთა გორელმა ფეხბურთელმა დავით რაჟამაშვილმა მახვილგონივრული პასით შეატოვა მეკარეს პირისპირ...

ამასობაში, საპირისპირო კართან მარცვალაძემ გაფლანგა გატანის შანსი. მერე სამტრედიელებმა თანდათან გაისწორეს სამიზნე, სტუმრებს ფეხმარდი იმერლების მიერ შეთავაზებულ ტემპზე აყოლაც გაუჭირდათ და ტაიმის მიწურულს ჯერ ნიკა სანდოხაძემ, შემდეგ ენდელაძემ მოედანზე შექმნილი ვითარება ტაბლოზე ასახეს - 3:0.

გოლების სიუხვეს არბიტრი აბდულა ბასლეჰლოც არ ჩამორჩა და თავის მხრივ, ყვითელი ბარათები არიგა უხვად.

შესვენების შემდეგ თამაშში გოგიტა გოგუა ჩაერთო. "დილას" პირველივე შეტევას საკმაოდ სახიფათო "სტანდარტული" მოჰყვა, თუმცა გოგუამ ის "ცოცხალ კედელს" გაარტყა.

ცოტა ხანში გორელ მცველებს ზურგს უკნიდან კიდევ ერთხელ გადაუგდეს ბურთი (გიორგი დათუნაიშვილი), რომელსაც ენდელაძე გამოეხმაურა და დუბლი გაიფორმა - 4:0.

"დილა" პრესტიჟის გოლის გატანასაც ვერ ახერხებდა. ცეცაძის შეგირდებმა კი ინიციატივა ხელიდან აღარ გაუშვეს, მიღწეულით არ დაკმაყოფილდნენ და ნოკდაუნში მყოფი მოწინააღმდეგე ბოლომდე "გაიმეტეს": 77-ე წუთზე ამ მატჩში ერთ-ერთ საუკეთესო მოთამაშე რაჟამაშვილს შევჩენკომ კი აუღო, მაგრამ უკრაინელმა სიხარულიძის დამატებულს ვეღარაფერი მოუხერხა - 5:0.

"სამტრედიამ" ამ გამარჯვებით საჩემპიონო განაცხადი გააკეთა და სატურნირო ცხრილში ბურთების უკეთესი შეფარდებით "დილასაც" გადაასწრო.

საქართველოს ეროვნული ჩემპიონატი. უმაღლესი ლიგა. VII ტური
03.10. სამტრედია, ეროსი მანჯგალაძე
სამტრედია-დილა 5:0
გოლები: 1:0 ზივზივაძე (12), 2:0 სანდოხაძე (43), 3:0 ენდელაძე (45+1. ჯიქიას პასით), 4:0 ენდელაძე (57. დათუნაიშვილის პასით), 5:0 სიხარულიძე (77)
სამტრედია (4-4-2): მეშველიანი - მთივლიშვილი (81. იოსელიანი), ცნობილაძე, სანდოხაძე, შერგელაშვილი - ზივზივაძე, დათუნაიშვილი, რაჟამაშვილი, ენდელაძე (66. გოგიაშვილი) - ჯიქია (75. მჭედლიშვილი), სიხარულიძე.
სათადარიგოები: თებიძე, ცინცაძე, ახალაძე, მარკოზაშვილი
მწვრთნელი: გია ცეცაძე
დილა (4-4-2): შევჩენკო - ღონღაძე (26. ხურცილავა), კვახაძე, ქარქუზაშვილი, ნავალოვსკი - ნონიკაშვილი (46. გოგუა), ფალავანდიშვილი, გვალია, ერისთავი (61. ილურიძე) - მოდებაძე, მარცვალაძე.
სათადარიგოები: მუჯრიშვილი, კვირკველია, პაპავა, მაშუკოვი
მწვრთნელი: მილოვან მატიასევიჩი
გაფრთხილება: ქარქუზაშვილი (30), ცნობილაძე (34), ფალავანდიშვილი (39), ერისთავი (40), მთივლიშვილი (41), შერგელაშვილი (47), ჯიქია (62)
არბიტრი: ა. ბასლეჰლო.

ბომბარდირები
ნ. კაჭარავა (ცხინვალი) 8
გ. ბერიაშვილი (დინამო ბთ) 6
ი. სიხარულიძე (სამტრედია) 6
გ. ქვილითაია (დინამო თბ) 5
ი. მოდებაძე (დილა) 5

მომდევნო, VIII ტური
17 ოქტომბერი, შაბათი
კოლხეთი-ლოკომოტივი
საბურთალო-საპოვნელა
მერანი-შუქურა
ზუგდიდი-სიონი
დინამო (ბთ)-სამტრედია
ტორპედო-დინამო (თბ)

18 ოქტომბერი, კვირა
დილა-გურია
ცხინვალი-ჩიხურა.

(იბეჭდება მცირე ცვლილებით)
ყოველდღიური სპორტული გაზეთი "ლელო"