ლეგიონის უქმეები: მჭედლიძე სასტარტოში და შეყილაძის დებიუტი სერია B-ში [VIDEO]

ლევან მჭედლიძის დაბრუნება "ემპოლის" სასტარტოში 4-თვიანი პაუზის შემდეგ; ირაკლი შეყილაძის დებიუტი "ლატინაში"; ჰოლანდიის ჩემპიონატის უიღბლო რესტარტი ქართველი ფეხბურთელებისთვის და ელგუჯა გრიგალაშვილის "გასროლა" კვიპროსში - ეს არის დღევანდელი ლეგიონის მიმოხილვის მთავარი თემები...

ლევან მჭედლიძე სექტემბრის შემდეგ პირველად ათამაშეს "ემპოლის" ძირითად შემადგენლობაში და ეს მილანის "ინტერთან" მოხდა.

ეს, რა თქმა უნდა, კარგია, მაგრამ 24 წლის ფორვარდმა თავი დიდად ვერ გამოიჩინა 0:0-ზე დასრულებულ შეხვედრაში, რომელშიც ყვითელი ბარათის მიღება მოასწრო, სანამ მასიმო მაკარონეთი ჩაანაცვლებდნენ 71-ე წუთზე.

"რამდენიმე მომენტი შევქმენით და უკეთ უნდა გამოგვეყენებინა. მეტოქე ძლიერი იყო, მაგრამ კარგად იცოდა, რომ ამ სტადიონზე ყველას უჭირს. მეორე ტაიმში უკეთ თამაში გვმართებდა. ბევრს ვმუშაობთ, რომ უკეთ ვითამაშოთ მომავალში", - განაცხადა ქართველმა ფორვარდმა მატჩის მერე.

"მჭედლიძე - 6,5 ბალი. ქართველმა ჩვეული შემართებით და ფიზიკური ძალით ითამაშა. იბრძოდა, თავს სწირავდა, მაგრამ, სამწუხაროდ, სხვა თვისებები ნაკლებად აქვს - თუნდაც "მკვლელის" ინსტინქტი. საერთო ჯამში, კარგად ითამაშა", - ეს "პიანეტა ემპოლის" შეფასებაა.

მჭედლიძის ყოფილ თანაგუნდელ ირაკლი შეყილაძეს კი სერია B-ს "ლატინაში" ჰქონდა დებიუტი. "ლატინა" შინ დაუზავდა (0:0) "ვიჩენცას". ირაკლიმ მოედანზე ბოლო 20 წუთი გაატარა და "ტუტო ლატინას" ცნობით, ურიგოდ არ უთამაშია.

ფრანგულ ლიგა 1-ში "ბასტიამ" სტუმრად 1:1 ითამაშა "ტულუზთან". კორსიკელთა განაცხადში კვლავ არ ყოფილა ლუკა კიკაბიძე.

მართალია, ამირან სანაია უკვე ფრანგული ლიგა ნასიონალის ბინადარ "პარიზის" წევრია, მაგრამ მას არ უთამაშია "ლე პუართან" 1:0-ზე მოგებულ შეხვედრაში. "პარიზი" 38 ქულით ერთპიროვნული ლიდერია.

ცუდად განაახლა პირველობა ქართველთა "ვიტესმა", რომელიც შინ ლიდერ პსვ-სთან 0:1 დამარცხდა. კაპიტანმა გურამ კაშიამ შეუცვლელად ითამაშა, ხოლო ვაკო ყაზაიშვილი 74-ე წუთზე შეცვალეს.

ბელგიის ჟუპილერ ლიგაში ქართველების "გენკი" "ლოკერენს" სტუმრობდა. თორნიკე ოქრიაშვილმა სრულად ითამაშა და 54-ე წუთზე ყვითელი ბარათი მიიღო, ლუკა ზარანდია კი განაცხადში იყო და ბოლომდე თადარიგში დარჩა.

რაც შეეხება თამაშს, ის 1:1 დამთავრდა. ამ შედეგმა "გენკის" სატურნირო მდგომარეობა ვერ შეცვალა - ალექს მაკლიშის გუნდი 33 ქულით მე-7 ადგილზეა.

საბერძნეთში ძალიან ცუდ სიტუაციაშია ქართველთა ოფი. ფინანსური პრობლემების გამო კრეტულ კლუბს 6 ქულა ჩამოაკლეს და ახლა გასავარდნ ზონაშია. სწორედ ამ მიზეზით არ უთამაშია გიორგი მერებაშვილს "ვერიასთან" 1:4-ზე წაგებულ შეხვედრაში.

გიორგი ლორიას კარში 4 გოლი გავიდა, თუმცა მეტიც თავისუფლად შეიძლებოდა. 30-ე წუთზე სტუმრები ათნი დარჩნენ, ხოლო ლორიამ მეტოქეს მეორე პენალტი არ გაატანინა. მანამდე "ვერია" სწორედ პენალტით დაწინაურდა. სხვათა შორის, ქართველი გოლკიპერი მთლად მზად არ იყო, მაგრამ გუნდის ინტერესები საკუთარ ჯანმრთელობაზე წინ დააყენა.

აკაკი ხუბუტიას დებიუტს "კერკირაში" კვლავ ველით. ის "ქსანთისთან" უგოლოდ დასრულებულ მატჩში მასპინძელი გუნდის სათადარიგო იყო.

კვიპროსის ჩემპიონატში მორიგი, მე-17 ტური გაიმართა. "ოთელოსი" ჩემპიონ აპოელ-ს ესტუმრა და ქულები დააკარგვინა - 1:1. ეს კი ქართველთა დამსახურებაა, სტუმართა კარში როინ კვასხვაძე იდგა, სრულად ითამაშა ლევან ხმალაძემ, ხოლო ელგუჯა გრიგალაშვილმა 50-ე წუთზე ანგარიში შესანიშნავი შორეული დარტყმით გახსნა. ის მე-80 წუთზე შეცვალეს. გრიგალაშვილმა ამ სეზონში მეორე გოლი გაიტანა.

"ნეა სალამინა" სტუმრად 0:5 დამარცხდა "აპოლონთან". შოთა გრიგალაშვილს არ უთამაშია.

უჩა ლობჟანიძის "ომონია" სტუმრად დაუზავდა "ერმისს". ქართველმა მცველმა შეუცვლელად ითამაშა, მეორე ტაიმში კი გააფრთხილეს.

"ანორთოსისი" აელ-თან აგებდა, მაგრამ საბოლოოდ 2:1 იმარჯვა უშუალო კონკურენტთან (ზედა ექვსეულში მოსახვედრად). ირაკლი მაისურაძემ 90 წუთი ითამაშა და ყვითელი ბარათი მიიღო, რომელიც მისთვის მეექვსეა და შემდეგი ტურის გამოტოვება მოუწევს. გიორგი აბურჯანია 69-ე წუთზე გამოჩნდა.

პორტუგალიის ჩემპიონატში კვლავ არ ჩანს აუტსაიდერ "ჟილ ვისენტეს" ნახევარმცველი ავთო ებრალიძე, რომელმაც ტრავმა კი მოირჩინა, მაგრამ ეტყობა, ჯერ სათამაშოდ მზად არ არის.

ამასობაში კი მისმა გუნდმა მორიგი მარცხი იწვნია - სტუმრად 0:2 დამარცხდა "ბელენენსეშთან" და კვლავ ბოლო ადგილზეა.

ყოველდღიური სპორტული გაზეთი "ლელო"