იცოდით, რომ ამერიკაში საფეხბურთო სკოლა "ვიტ ჯორჯია-ბრუკლინი" დაარსდა? ეს სიურპრიზი "სამტრედიის" კაპიტანმა გიორგი დათუნაიშვილმა გაგვანდო. გულშემატკივარმა ჯერ მისი ძმა - პავლე (პაატა) დათუნაიშვილი გაიცნო. კარიერა მანაც "ვიტ ჯორჯიაში" დაიწყო და საქართველოს ახალგაზრდულ ნაკრებშიც ითამაშა. ის ჯერ 33 წლისაა, თუმცა ფეხბურთს 2012 წელს დაანება თავი და ბედის საძიებლად ამერიკაში წავიდა.
როგორ აეწყო მისი საქმეები, თავად პაატა დათუნაიშვილის მონათხრობიდან შეიტყობთ.
"ოთხი წელიწადია, რაც ამერიკაში ვარ. თავიდან, 6 თვე მოყვარულთა გუნდში ვთამაშობდი. მერე კი კარიერის დასრულება და მწვრთნელობა გადავწყვიტე. ამის გამო, თბილისში დავბრუნდი,
ვეტერანი ფეხბურთელის თქმით, ამერიკაში რამდენიმე საფეხბურთო სკოლაში მუშაობდა:
"ოდესის "ჩერნომორეცის" ყოფილი ფეხბურთელები ნიუ-იორკში დიდი ხნის წინ დასახლდნენ და 25 წელია, საფეხბურთო აკადემია "ჩერნომორეც-ბრუკლინი" დააფუძნეს. მათ აკადემიაში ამიყვანეს და ასე დაიწყო ჩემი სამწვრთნელო კარიერა.
სხვათა შორის, არასწორი წარმოდგენებია, თითქოს ამერიკაში ფეხბურთი პოპულარული არ არის. ძალიანაც პოპულარულია, მათ შორის - გოგონებშიც. აქ მათი თითქმის იმდენივე ჯგუფია, რამდენიც - ვაჟების".
ოდესელებთან მუშაობამ პაატა დათუნაიშვილს უბიძგა, ქართული სახელის მქონე საფეხბურთო სკოლა დაეფუძნებინა:
"ჩემთან საფეხბურთო სკოლაში 50 ქართველი ბავშვი მაინც ვარჯიშობს. ამიტომ უკრაინელებთან ერთად მინდოდა, "ვიტ ჯორჯია-ბრუკლინი" დამეფუძნებინა. მე ამ გუნდში ვიზრდებოდი და ამით მსურდა, სიყვარული გამომეხატა.
ამის შესახებ "ვიტ ჯორჯიას" პრეზიდენტ გურამ რუხაძეს ველაპარაკე. მას იდეა ძალიან მოეწონა. თუმცა, თანამშრომლობის სურვილი სხვა კლუბსაც თუ ექნებათ, არ შევიზღუდებით.
სკოლის ამოქმედება ძალიან რთული საკითხი იყო, ათასი იურიდიული პრობლემის მოგვარება გახდა საჭირო, მაგრამ მაინც გადავწყვიტე".
დათუნაიშვილი თავის საქმიანობაზე მოგვითხრობს:
"ოთხ ასაკობრივ ჯგუფს ვავარჯიშებ, სადაც 8-დან 12 წლამდე ბავშვები დადიან. ახლახან, ასისტენტად ამერიკაში მცხოვრები ყოფილი ფეხბურთელი ლევან ჭიპაშვილი ავიყვანე.
სხვათა შორის, ამერიკაში ბევრი ყოფილი ფეხბურთელი ვნახე - გია მეგრელაძე, ყოფილი ვიტჯორჯიელი დათო დოლიძე, "ცხინვალის" ყოფილი ფეხბურთელები - ბაჩი ბოლქვაძე და ილია კანდელაკი. ვიცი, რომ აქ ცხოვრობენ მეკარე გია ცინაძე და მამუკა წერეთელი, რომელიც ასევე ბავშვებთან მუშაობს.
სხვათა შორის, ბრუკლინში სკოლა იმიტომაც დავაფუძნე, რომ ნიუ-იორკში ბევრი ქართველი ცხოვრობს და მართალიც აღმოვჩნდი - "ვიტ ჯორჯია-ბრუკლინმა" კიდევ უფრო მეტი ქართველი ბავშვი მოიზიდა. ბედნიერი ვიქნები, საქართველოს ნაკრებს ერთ მოთამაშეს მაინც თუ გავუზრდი. იდეები ბევრია და პროექტების განხორციელება გვსურს. ახლა ტურნირის ჩატარებას ვაპირებთ და მასში ქართული გუნდების მოწვევასაც ვფიქრობთ".
ახალგაზრდა სპეციალისტი გველაპარაკა იმაზეც, თუ რა პირობებში ვარჯიშობენ მისი გუნდები:
"ამერიკაში სტადიონების უდიდესი ნაწილი სახელმწიფოს აშენებულია. აქ ყველა სკოლასა და კოლეჯს სტანდარტული მოედანი აქვს. ასეთ სარბიელზე ვარჯიში ნებისმიერ მსურველს შეუძლია, ოღონდ ჯანსაღი ცხოვრება ისურვოს და ყველანაირად ხელს უწყობენ.
საკუთარი სკოლის აშენება კი ჩემთვის ძალიან ძნელი იყო. ამიტომ, 2 მოედანი ვიქირავე. მაგრამ ახლა უკვე აცივდა და დარბაზში შევედით, სადაც ასევე სტანდარტული სტადიონი და კომფორტია. რაც მთავარია, ძალიან კარგი საფარია, თითქოს, ბუნებრივ მინდორზე ვვარჯიშობთ.
იმედი მაქვს, "ვიტ ჯორჯია-ბრუკლინის" სკოლა სიცოცხლისუნარიანი იქნება და ქართულ ფეხბურთს გვერდში ასე მაინც დავუდგები".
(იბეჭდება მცირე ცვლილებით)
ყოველდღიური სპორტული გაზეთი "ლელო"
