ნიკა საბანაძე: ასე მგონია, მთელი მარტვილი ჩამოვა...

დღეს, 22 ნოემბერს, საქართველოს დავით ყიფიანის სახელობის თასის ფინალი გაიმართება, რომელშიც ერთმანეთს ქუთაისის "ტორპედო" და მარტვილის "მერანი" დაუპირისპირდებიან. შეხვედრა ზესტაფონში, დავით აბაშიძის სახელობის სტადიონზე, 19:00 სთ-ზე დაიწყება და მის პირდაპირ ტელეტრანსლაციას "პირველი არხი" წარმოადგენს.

- მერანი VS ტორპედო - "მერანი" პირველად, "ტორპედო" მეშვიდედ!

პირველლიგელ "მერანში" ბევრი ცნობილი ფეხბურთელი თამაშობს. მათ შორის გამორჩეულია ეროვნული ნაკრების ყოფილი კანდიდატი ნიკა საბანაძე. 25 წლის თავდამსხმელი მარტვილის კლუბში წლეულს, ზაფხულში ჩაირიცხა. მანამდე კი რამდენიმე გუნდში უთამაშია, მათ შორის, 5 წელი დღევანდელი მეტოქის, ქუთაისის "ტორპედოს" რიგებში გაატარა - გულშემატკივრებმა ბომბარდირული თვისებებით დაჯილდოებული თავდამსხმელი სწორედ ქუთაისური კლუბიდან გაიცნო.

საბანაძე ამბობს, რომ ფინალი ამის გამო კიდევ უფრო მნიშვნელოვანი გახდა.

- არასწორი ინფორმაცია გავრცელდა, თითქოს, ტრავმირებული ვიყავი. სინამდვილეში, მხოლოდ საჩხერის "ჩიხურასთან" თასის ნახევარფინალში არ მითამაშია, რადგან ზედმეტი ყვითელი ბარათები მქონდა. მას შემდეგ ისევ ჩვეულებრივად ავთამაშდი.

- ფინალზე ვილაპარაკოთ. პირველი ლიგის გუნდისთვის მარტო ფინალში გასვლაც კი გმირობად ჩაითვალა...
- ჩვენ ის შევძელით, რაც აქამდე მხოლოდ "გაგრამ" მოახერხა. მაგრამ მხოლოდ ფინალში გასვლით არავინ კმაყოფილდება, როცა თასი ხელის გაწვდენაზეა. ძალიან დაძაბული და საინტერესო თამაშის მოლოდინში ვართ და იმედია, კარგი სანახაობაც იქნება.

- სურვილი გასაგებია, მაგრამ თქვენი აზრით, პირველლიგელს უმაღლესი ლიგის წარმომადგენლის დამარცხება შეუძლია?
- ჩვენი ბიჭების მეიმედება. თავიდან ისეთი კარგი შემადგენლობა შეიკრიბა, ყველა ფიქრობდა, რომ პირველ ლიგაშიც უპრობლემოდ გავიმარჯვებდით, მაგრამ ნელ-ნელა "დავიქოქეთ" და ნამდვილ გუნდად ახლა ჩამოვყალიბდით. ძალიან მეგობრული გუნდია, მწვრთნელსაც კარგად გავუგეთ და შევთამაშდით. დარწმუნებული ვარ, ასეთი შემადგენლობით უმაღლეს ლიგაშიც ბევრი ვერ დაიკვეხნის. მოგების უნარი რომ გვაქვს, "ჩიხურასთანაც" დავამტკიცეთ - გუნდი, რომელიც ჩემპიონობისთვის იბრძვის, 3:0 დავამარცხეთ!

ასე რომ, მჯერა, ზესტაფონურ ფინალშიც მაგრად ვიბრძოლებთ.

- "ტორპედოს" როგორ დაახასიათებდით?
- ეს ჩემი ყოფილი გუნდია და ფინალში ორმაგი მოტივაცია მაქვს, ოღონდ - უარყოფითი მუხტის გარეშე. ჩხეტიანმა გუნდს ხელი დაატყო და ვხედავთ, რომ "ტორპედო" აშკარად იზრდება. ბოლო ტურებსა და იმავე თასის ნახევარფინალში ისეთი ფეხბურთი აჩვენა, სასიამოვნო სანახავი იყო...

მაგრამ შევეშვათ იმას, რომ სამშაბათს ფინალია და ეს გუნდი ჩემი მოწინააღმდეგეა. "ტორპედოს" ყოფილი ფეხბურთელი ვარ და ეს გუნდი ჩემთვის ბევრს ნიშნავს. დიდ ფეხბურთში ფეხი იქ ავიდგი და ქუთაისში გამოვჩნდი. მიყვარს ეს ქალაქიც, გუნდიც და მისი ქომაგებიც. ბოლოს და ბოლოს, იქ არაერთი მეგობარი დავტოვე და "ტორპედოს" წინსვლა ამიტომაც მახარებს.

- არის მოლოდინი, რომ სტადიონი გაივსება...
- ქუთაისსა და მარტვილში ფეხბურთი ისე უყვართ, ტრანსპორტი რომ არ გამოეყოთ, ხალხი თავისით მაინც წამოვიდოდა. დარწმუნებული მარტო იმაში კი არ ვარ, რომ სტადიონი ბოლომდე შეივსება, ასე მგონია, თამაშზე მოსვლის ბევრი მსურველი სტადიონს მიღმა დარჩება. 4 600 ადგილს მარტო გუნდების ფანები შეავსებენ.

ყველამ იცის, ქუთაისში რა მაგარი გულშემატკივრები არიან. მარტვილს კი ასეთი წარმატება არასოდეს ღირსებია და ხალხი ქუჩაში რომ გვხვდებოდა, დიდიან-პატარიანად ყველა ფინალზე გველაპარაკებოდა. ასე მგონია, თითქმის მთელი ქალაქი ზესტაფონში ჩამოვა. ზესტაფონელებსაც ხომ ძალიან უყვართ ფეხბურთი... ამიტომაც მგონია, რომ სტადიონი აუცილებლად შეივსება...

სიმართლე გითხრათ, მე ფინალს ისე ველოდები, როგორც ზეიმს და სწორედ ამ მიზეზით - სავსე ტრიბუნების წინაშე თამაშის პერსპექტივა მახარებს. ეს დიდი სიამოვნებაა, რომელსაც საქართველოში მხოლოდ რაიონების პატარა სტადიონებზე ვგრძნობთ და მინდა, ეს თასის ფინალშიც განვიცადო. ამის გარეშე ფეხბურთელი ნამდვილ სათამაშო განწყობას ვერ შეიქმნის.

ყოველდღიური სპორტული გაზეთი "ლელო"