ერიკ ჰამრენს რაღაც მზაკვრული ჰქონდა ჩაფიქრებული და ამან კინაღამ გაჭრა. შვედებმა უფრო აგრესიულად დაიწყეს და ნახევრადმომენტებიც ჰქონდათ. ჯერ იოჰან ელმანდერი ცდილობდა გამწვავებას. მერე სებასტიან ლარსონი ლამობდა გატანას, ზლატან იბრაჰიმოვიჩის ეფექტური თამაშის შემდეგ. ეს ყველაზე სახიფათო ეპიზოდი და ამავდროულად მთელი მატჩი სტუმართა ერთადერთი ზუსტი დარტყმა გახლდათ, მაგრამ რუი პატრისიომ იყოჩაღა. მესამე მომენტი კი კიმ კალსტრიომს ჰქონდა, რომელმაც ცოტა ააცილა.აქედან მოყოლებული, პორტუგალიელები დამშვიდდნენ, თამაში დაალაგეს და ნელ-ნელა მეტოქე მაქსიმალურად შეავიწროვეს. სადღაც 25-ე წუთიდან ბოლომდე თამაში თითქმის მთლიანად შვედების ნახევარზე მიდიოდა და
სკანდინავიელთა ბანაკში მატჩამდე ბევრს საუბრობდნენ იმაზე, რომ გოლის გატანა იყო ძალიან მნიშვნელოვანი და რადგან თავიდან ამის გაკეთება არ გამოვიდა, ხოლო მერე, პორტუგალიამ მეტოქე მარწუხებში მოაქცია, როგორც ჩანს, შვედები სრულად თავდაცვაზე გადაერთვნენ - ვერ გაგვაქვს, მაგრამ არ გავუშვათ მაინცო.
დრო გადიოდა და საქმეში ნელ-ნელა ნერვებიც ჩაერთო... ნიკოლა რიცოლიმ მოკლე მონაკვეთში ლარსონს, რონალდოს და ელმანდერს მისცა დასაშოშმინებელი ყვითლები. მერე შვედებმა ჩვენი გაოცება გადაწყვიტეს და "სიმულაციის სამშობლოში" სიმულაციით მოინდომეს ფონს გასვლა - ერთ ეპიზოდში ელმანდერი მეტოქის საჯარიმოში თეატრალურად დაეცა და მალევე წამოხტა, თავადვე შერცხვა, თან გაყვითლებული რომ იყო, ესეც გაახსენდა. იქამდე კი, მიკაელ ლუსტიგმა გადაწყვიტა უკვე ძალიან ანერვიულებულ რონალდოსთან პატარა შეხლა-შემოხლა გაეფორმებინა და ხელი სახეზე იტაცა... რონალდომ მას მსგავსივე ჟესტიკულაციით გასცინა და ამას კიდევ ცალკე პატარა გარჩევა მოჰყვა.
შვედეთმა ვეღარ გაძლო. 82-ე წუთზე მიგელ ველოზომ მარცხენა ფლანგზე ჩაირბინა და საჯარიმოში მშვენივრად ჩააწოდა, პრინციპში დაბალი ბურთი გამოვიდა... კრიშტიანო რონალდო კი ჩვეულად შეფრინდა, შეიძლება ითქვას, რომ ფლანგიდან ცენტრში შემოწეულ მარტინ ოლსონს ფეხებში შეუვარდა და ამ ეფექტური თავურით თავისი გასკეთებელი გააკეთა. დარტყმული ახლოდან იყო, ანდრეს ისაკსონი არაფერ შუაშია.
გულშემატკივრებმა, რომლებსაც "და ლუჟზე" დიდებული გარემო ჰქონდათ შექმნილი და გოლს ამდენი ხანს ელოდნენ ძალიან გაიხარეს, მაგრამ ყველაზე ბედნიერი თავად რონალდო იყო, რომლის გამომეტყველებიდან სიამაყე და სიხარული ერთობლივად გამოსჭვივოდა. მან დაამტკიცა! და ორგზის დაამტკიცებდა, სულ ცოტა ხანში მეორეც რომ შეეგდო, მაგრამ არ გაუმართლა - ხარიხა.
საერთოდ ბოლოს, იქმნებოდა შთაბეჭდილება, რომ შვედები გასწრებაზე იყვნენ. ცოტაც და პორტუგალია მეორესაც გაიტანდა. მთელ ამ ისტორიაში, ყველაზე უცნაური, მაგრამ არა მოულოდნელი - იბრაჰიმოვიჩის ოლიმპიური სიმშვიდე გახლდათ - ზლატანი ასეთია, ხანდახან იცის ხოლმე. ვნახოთ რას იზამს იგი საპასუხო მატჩში.
რამდენიც არ უნდა ისაუბროს პორტუგალიელთა თავკაცმა პაოლო ბენტომ იმაზე, რომ ტურნირს კარგი გუნდი იგებს და არა ინდივიდუალურად რომელიმე გამორჩეული ფეხბურთელი და იდეაში, ძნელია არ დავეთანხმოთ... ფაქტია, ტურნირზე ვერ მოხვდები თუ ასეთი მატჩი ვერ მოიგე, ეს მატჩი კი "იმან" მოიგო.
მთლიანობაში, სანახაობრივი კუთხით შეხვედრამა სულ ცოტა გაგვიცრუა იმედები, მაგრამ მაღალი კლასის ფეხბურთი მაინც ვიხილეთ. ახლა კი, როდესაც პორტუგალია არც ისე საიმედო უპირატესობით ჩადის სოლნაში, ხოლო შვედეთს არაფერი და ამავე დროს ძალიან ბევრი აქვს დასაკარგი... "ფრენდს არენაზე" არანაირი მეგობრობა არ იქნება - დიდ მატჩს ველით, მატჩს გოლებითა და ნერვების წყვეტით. ჯერი იბრაზეა.
იხილეთ ვიდეო
პორტუგალია-შვედეთი 1:0გოლი: 1:0 რონალდო (82)
პორტუგალია (4-3-3): პატრისიო - პერეირა, ბ. ალვეში, პეპე, კოენტრაო - მოუტინიო, ველოზო, მეირელეში (79. ჟოსუე) - ნანი, პოშტიგა (66. უგო ალმეიდა), რონალდო.
შვედეთი (4-4-2): ისაკსონი - ლუსტიგი, ანტონსონი, ნილსონი, ოლსონი - კაჩანიკლიჩი, ელმი (72. ვერნბლოომი), ს. ლარსონი, კალსტრიომი (78. ა. სვენსონი) - იბრაჰიმოვიჩი, ელმანდერი (88. გერნდტი).
არბიტრი: ნიკოლა რიცოლი (იტალია)
გაფრთხილება: პერეირა, ს. ლარსონი, რონალდო, ელმანდერი
კუთხური: 14-4 ჯარიმა: 10-12 თამაშგარე: 1-1 კარში დარტყმა: 12-5(3-1) ბურთის ფლობა: 46%-54%.
მაყურებელი: 64 000
საპასუხო მატჩი 19 ნოემბერს
ყოველდღიური სპორტული გაზეთი "ლელო"
