რუსეთთან შეცდომის უფლების გარეშე - "ბორჯღალოსნებმა" წინასამატჩო პრესკონფერენცია ჩაატარეს

AutoSharing Option
რუსეთთან გასამართ მატჩამდე 24 საათით ადრე, "ბორჯღალოსნებმა" "მიხეილ მესხზე" ბოლო, კაპიტნის ვარჯიში გამართეს.

შეგახსენებთ, შეხვედრა 7 თებერვალს 15 საათზე დაიწყება და რეფერი პორტუგალიელი პაულუ დუარტე იქნება, რომელსაც კიდეებიდან მოლდოველი ეუჯენ პროკოპი და ქართველი შოთა თევზაძე დაეხმარებიან.

"ბორჯღალოსნების" მთავარი მწვრთნელი ლევან მაისაშვილი ამბობს, რომ გუნდი ამ თამაშს კარგად მომზადებული ხვდება:

"ნაყოფიერი კვირა გვქონდა და ვთვლი, რომ კარგად მოვემზადეთ. გუშინ ბიჭებს დასვენების დღე ჰქონდათ, რაც ძალების აღედგენაში დაგვეხმარა. ველოდებით დინამიურ თამაშს და ვეცდებით შემტევი რაგბი ვაჩვენოთ, მაქსიმალურად გამოვიყენოთ ის უპირატესობები, რაც მეტოქესთან
გაგვაჩნია. როგორი იქნება თამაშის სურათი, ჩვენზეა დამოკიდებული. საჭიროა, რომ მოვიგოთ ორთაბრძოლები, ვაკონტროლოთ შეჯგუფებები და ამის შემდეგ ხელდახელ თამაშის შესაძლებლობაც გვექნება".

აღსანიშნავია, რომ საქართველოს ნაკრების საშუალო ასაკი 24-25 წელია და ფაქტობრივად, "ბორჯღალოსნები" ხვალინდელ მატჩს ერთ-ერთი ყველაზე ახალგაზრდული შემადგენლობით ჩაატარებენ. შემადგენლობასთან დაკავშირებით მწვრთნელმა განაცხადა:

"მეორე ხაზში ვიხილავთ ლაშა ჯაიანისა და გიორგი ჯავახიას წყვილს. ჯაიანს ბოლო პერიოდში დიდი პროგრესი ჰქონდა და მისი შემადგენლობაში დაყენებასთან დაკავშირებით კითხვები არ გაჩენილა. ჯავახიას ტრავმები აწუხებდა და „შემოდგომის ერთა თასზე“ უმეტესად შეცვლაზე უწევდა თამაში. ის გუნდს დიდ ენერგიას მატებდა, ახლა კარგ ფორმაშია და იმედი მაქვს თავს კარგად წარმოაჩენს.

ზაფხულის შემდეგ ბევრი იშრომა დავით ნინიაშვილმა. ის ძალიან მშრომელია და ეტაპობრივად მივეცით სათამაშო დრო, ახლა კი ძირითადში ყოფნა დაიმსახურა. მესმის, რომ ეს გარკვეულ წნეხთან იქნება დაკავშირებული, მაგრამ დარწმუნებული ვარ ამოცანას კარგად გაართმევს თავს.

გარკვეული შესვენების შემდეგ გვიბრუნდება ზურაბ ჟვანია, რომელსაც გარკვეული პერიოდი ტრავმები ჰქონდა და კლუბშიც ვერ თამაშობდა. გარდა ამისა, ბურჯის პოზიციაზე დიდი კონკურენციაა და მისი გარკვეული პერიოდით არყოფნის მიზეზი ესეც იყო. ახლა ის ფიზიკურად კარგადაა და მისგან ჩვეულ სტილში თამაშს ველით".

ახალი სახეებია რუსეთის ნაკრების შემადგენლობაშიც. მაისაშვილმა მეტოქესთან დაკავშირებით განაცხადა:

"რუსეთი ჩვენთვის კარგად ნაცნობი გუნდია. ისინი მუდმივად ცდილობენ ახალი სახეების შემოყვანას, რათა ჩვენთან არსებული ფსიქოლოგიური ბარიერი გადალახონ. გუნდი ფიზიკურად და ტექნიკურად კარგადაა მომზადებული, თუმცა დარწმუნებული ვარ, ყველა კომპონენტში უპირატესობა გვექნება და ვეცდებით მეტოქე თავიდანვე წნეხში მოვაქციოთ.

სამწუხაროდ, თამაში უმაყურებლოდ ჩაივლის, რაც რაგბისათვის არატიპიურია. მსგავსი პრაქტიკა "შემოდგომის ერთა თასზე" გვქონდა. ჩვენ განებივრებული ვართ გულშემატკივრის მხურვალე მხარდაჭერით, მაგრამ არსებულ სიტუაციასთან შეგუება მოგვიწევს“.

Sportall.Ge

მერაბ შარიქაძე: "ეს ისეთი თამაშია, შეცდომის დაშვების უფლება არ გვაქვს"

მიუხედავად იმისა, რომ გუნდის შემადგენლობა მნიშვნელოვნადაა გადახალისებული, კარგი თამაშის მოლოდინი აქვს "ბორჯღალოსნების" კაპიტან მერაბ შარიქაძეს:

"ისეთი მნიშვნელობის თამაშია, რომ არ გვაქვს უფლება ჩვენზე რაიმე ფაქტორმა უარყოფითად იმოქმედოს. ყველა მორაგბემ, რომელიც 23-კაციან განაცხადშია, ეს უფლება თავისი შრომით დაიმსახურა და დარწმუნებული ვარ, ამოცანას თავს კარგად გავართმევთ".

კაპიტანი ცენტრში თამაზ მჭედლიძეს შეუწყვილდება, რომელთან ერთადაც თითქმის ორი წელია თამაში არ დაუწყია:

"მას შემდეგ გარკვეული პერიოდი გავიდა, თუმცა ეს კვირა კარგად ვიმუშავეთ და ვფიქრობ, ამოცანას თავს ეფექტურად გავართმევთ. რუსეთი ჩვენთან ფეხით ცდილობს თამაშს და წნეხის შექმნას, რათა ჩვენს შეცდომებს დაელოდოს, რისთვისაც მზად ვართ. მათთან გამარჯვებების დიდი სერია გვაქვს, რაც გარკვეული წნეხია. მათთან დაშვებული ნებისმიერი შეცდომა ჩვენთვის და გულშემატკივრისთვის უფრო მძიმედ აღიქმება. თუმცა მჯერა, რომ "შემოდგომის ერთა თასზე" მიღებული გამოცდილება ამ წნეხის დაძლევაში დაგვეხმარება".

rugby.ge

მკითხველის კომენტარები / 3 /
მაისაშვილო შეხვედი ქართული რაგბის ისტორიაში? პირველი ტაიმი 0-0 რუსეთთან. იმ სპორტის სახეობას მომავალი არ აქვს სადაც წელიწადზე მეტია პრეზიდენტი ვერ აურჩევიათ!!! ფედერაციის პრეზიდენტობის ყველა კანდიდატს სირცხვილი!!! ვისაც რამე კავშირიაქვს ფედერაციასთან ყველას სირცხვილი!!! ძალით მოკალით ქართული რაგბი თქვენი ამბიციებისა და ჯიბის გამო!!! ძალიან დიდი ხნის წინ მოხდა ასე რუმინეთშიც,ვინც იცის რაგბის ისტორია მიხვდებით... ბანძებოოო!!!
zura
15:48 07-02-2021
1
შეცდომის გარეშე რუსეთთან არა? შეცდომა შეცდომაზეა, ნაკრებს ნამდვილი მწვრთნელი უნდა!!! ქართული რაგბის მკვლელებო!!!
zura
15:31 07-02-2021
0

სიახლეები პოპულარული