განვაგრძობთ საქართველოს XXIV სარაგბო ჩემპიონატის პირველი ეტაპის შეჯამებას. განვლილი 12 ტურის განმავლობაში სტადიონზე მისული გულშემატკივარი უაღრესად დაძაბული და საინტერესო მატჩების მომსწრე გახდა. უხვად იყო გატანილი ლელოები, ემოციათა დუღილი, გამარჯვებულთა სიხარული და დამარცხებულ მეტოქეთა მიმართ პატივისცემა.
ნიკო ჭავჭავაძის გაწვრთნილმა გუნდმა 2012-13 წლების სეზონში ეროვნულ პირველობაზე ვერცხლის მედლები მოიპოვა, თუმცა ეს ფაქტი გუნდის ხელმძღვანელობას დიდ წარმატებად არ ჩაუთვლია, რადგან ამბიციური კლუბის მიზანი ყოველთვის ჩემპიონობა გახლდათ.
ამიტომაც ზაფხულის სატრანსფერო ფანჯრის პერიოდში გუნდში არსებულ მოთამაშეთა საკმაოდ ძლიერ კონტინგენტს არაერთი გამოცდილი და პერსპექტიული მორაგბე დაამატა.
იოლად მოგებული ორი მატჩის შემდეგ გუნდს საკმაოდ ხანგრძლივი ჩავარდნა დაეწყო. "არმიამ" ეროვნულ ჩემპიონატში პირველი მარცხი პრინციპული მეტოქისგან, თანაქალაქელ "ლოკომოტივისგან" იწვნია.
თანაბარ ბრძოლაში მიმდინარე შეხვედრაში მოწინააღმდეგეებმა 2-2 ლელო გაუტანეს ერთმანეთს, თუმცა გადამწყვეტი გამოდგა რკინიგზელთა ფულბეკის, ბექა წიკლაურის ფეხჩუბინობა, რომელმაც "არმიას" 4 საჯარიმო, პლუს არეკნი და გარდასახვა გაუტანა, რამაც განაპირობა რკინიგზელთა წარმატება.
ნაწვნევი მარცხის შემდეგ, მომდევნო 2 ტურში ამჯერად ბედ-იღბალმაც აქცია ზურგი "არმიას". ნიკო ჭავჭავაძის გაწვრთნილი გუნდი ბოლო წამებზე გაშვებული საჯარიმო დარტყმით მხოლოდ ფრეს დასჯერდა "ჯიქებთან", ხოლო VI ტურის მატჩში "არმაზთან" დაპირისპირებისას 23:26 დამარცხდა.
ამჯერად დავით კიკნაძემ მსაჯის მიერ კომპენსირებულ მეორე წუთზე გაიტანა რთული მდგომარეობიდან საჯარიმო და მეორე მარცხი აწვნევინა არმიელებს.
მეტოქის ცუდ სპორტულ ფორმაში ყოფნით დროულად ისარგებლა ქუთაისის "აიამ" და გასულ სეზონში, წინასწარ ფინალში ნაწვნევი მარცხისთვის რევანში აუღო, ავჭალის სარაგბო სტადიონზე გამართულ მატჩში დაჩაგრა რა მეტოქე ყველა სარაგბო ასპექტში და დამსახურებული გამარჯვებაც იზეიმა - 24:18.
ოთხმატჩიანმა წარუმატებლობათა სერიამ შედეგად მოიტანა ის, რომ "არმიამ" არა მარტო ლიდერთა რიგები, არამედ საპლეიოფო ექვსეულიც დატოვა. თუმცა ნიკო ჭავჭავაძემ დროულად განახორციელა საკადრო ცვლილებები გუნდში: რამდენიმე ლიდერის სათადარიგოთა სკამზე გამწესებით და ახალგაზრდა მოთამაშეთა სასტარტოში დაყენებით "არმიამ" კვლავ დაიბრუნა თავდაჯერება და სატურნირო ცხრილში დაკარგული პოზიციების დაბრუნებას მიჰყო ხელი.
მათ ჯერ ბოლნისის ყოჩები" დაამარცხეს 3-ქულიანი სხვაობით - 16:13, რასაც მესამე ტურის გადადებულ შეხვედრაში მოპოვებული წარმატება მოჰყვა. არმიელებმა არანაირი შანსი არ დაუტოვეს "ბათუმს" და მეტოქე 59:21 დაჩაგრეს.
მოგებულ შეხვედრაში კიდევ ერთხელ გაიბრწყინა ფულბეკის პოზიციაზე გადაწეულმა გიორგი შკინინმა, რომელმაც ჰეთ თრიქი შეასრულა და საფუძველი შექმნა საკუთარი გუნდის პრემიალური ქულით გამარჯვებისთვის.
ერთთვიანი სანაკრებო პაუზა მშვენივრად გამოიყენა ნიკო ჭავჭავაძის გუნდმა. IX ტურის შეხვედრაში არმიელებმა გასული სეზონის ფინალურ მატჩში ნაწვნევი მარცხისთვის რევანში აუღეს მოქმედ ჩემპიონ "ლელოს" - 16:12 და სატურნირო ცხრილში მესამე პოზიციამდე აღზევდნენ.
ეროვნული ჩემპიონატის მეორე წრის სტარტი არმიელებს ძალიან კარგი გამოუვიდათ. გაშლილი და ლაღი რაგბის დემონსტრირებით მათ ჯერ "აკადემია" დატოვეს უშანსოდ - 31:13, შემდეგ რუსთავის "ხარებს" სძლიეს - 29:9, ხოლო XII ტურში სტუმრად მოუგეს "ბათუმს" - 54:14.
უკანასკნელ სამ მატჩში არმიელთა გარემარბმა ალექსანდრე ტუჩაშვილმა ხუთჯერ დაამიწა ბურთი მეტოქეთა ჩათვლის მოედანში, ხოლო არმიულმა კლუბმა სამ შეხვედრაში მოპოვებული 15 ქულით ცხრილში მეორე საფეხურამდე აიწია.
მიმდინარე ტურნირის ამ ეტაპზე რეალურად "არმიას" თავისი შესაძლებლობის 70% აქვს გამოვლენილი. მოთამაშეთა პოტენციალის სრული გამოყენების შემთხვევაში კი, დიდი შანსია, კლუბმა 2011 წლის მსგავსად, მეორედ იზეიმოს ჩემპიონობა 24 მაისს გასამართავ ფინალურ მატჩში.
სტატისტიკური დოსიე
სატურნირო მდგომარეობა: II ადგილი
მოპოვებული ქულები: 41 (8 მოგება, 1 ფრე, 3 მარცხი, 7 პრემიალური ქულა)
გატანილი ქულები: 339 (საშუალოდ მატჩში 28,5)
გაშვებული ქულები: 197 (საშუალოდ მატჩში 16,4)
საუკეთესო მელელოვე: ალექსანდრე ტუჩაშვილი (7)
საუკეთესო მექულე: ბახვა კობახიძე (77)
ბარათები: 13 ყვითელი
ყოველდღიური სპორტული გაზეთი "ლელო"
თქვენ კარგ საქმეს ემსახურებით და იმედს ვიტოვებ ეს შრომა უკვალოდ არ ჩაივლის. აუცილებლად ჰპოვებს შედეგს როგორც რაგბის ქართული ოჯახის ცხოვრებაში, ისე თქვენს სამოღვაწეო არეალში.
წარმატებები!