15-17 ივლისს ბათუმი საპლაჟო ჭიდაობაში მსოფლიოს ჩემპიონატს უმასპინძლებს, რომელიც სამივე ასაკობრივ ჯგუფში გაიმართება - ჭაბუკებში, ახალგაზრდებსა და უფროსებში როგორც ვაჟებში, ასევე - ქალებში. ჭიდაობის ეს სახეობა შედარებით ახალია და ცხოვრებაში უფრო გასართობ საშუალებად შემოდის, რადგან არც ისე მკაცრადაა რეგლამენტირებული და მონაწილეობა ყველას შეუძლია. ალბათ, ესეცაა ერთ-ერთი მიზეზი, რომ ის მსოფლიოში სულ უფრო პოპულარული ხდება. ამან ჭიდაობის საერთაშორისო ფედერაციას მსოფლიოს პირველობის ჩატარებისკენ უბიძგა და ნელ-ნელა ისიც მწყობრ სახეს იღებს.
ჩემპიონატის სამასპინძლოდ ბათუმი უკვე მზადაა - არენაც და სასტუმროებიც სტუმართა მისაღებად. სადღეისო
ბათუმშია და შეკრებას გადის საქართველოს ნაკრებიც ჯემალ კილაძის ხელმძღვანელობით. ჩემპიონატში ჩვენი გუნდი დაახლოებით 35 კაცით იასპარეზებს - ყველა ასაკში, თუმცა ჯერჯერობით მწვრთნელის ხელში 150-მდე ფალავანია, რადგან უმეტესობა ბაქოშია წასული საჭიდაოდ. ისინი ნაკრებს სამშობლოში დაბრუნების შემდეგ შეუერთდებიან. მწვრთნელები კვოტებს ძირითადად სრულად გამოიყენებენ, ანუ წონაში 3-3 მოჭიდავით წარსდგებიან. ყოველ შემთხვევაში, ეროვნულ ნაკრებში, სადაც შემადგენლობა ლამის ბოლომდეა გარკვეული, გელა საღირაშვილი, მარად ზოიძე, რამინ ფევაძე (სამივე - 80), ბექა ჭელიძე, არჩილ ქიტიაშვილი, ირაკლი მარსაგიშვილი (90), ლევან ბერიანიძე, გიორგი საკანდელიძე, გიორგი ნიკურაძე (+90) ნამდვილად იასპარეზებენ.
ჯერჯერობით გასარკვევი მხოლოდ 70 კილოგრამის საკითხია, სადაც 3 ვაკანსიაზე პრეტენზიას 6 კანდიდატი აცხადებს: კობა კაკალაძე, გიორგი ლობჟანიძე, მამუკა ხოზრევანიძე, არჩილ თურმანიძე, პაატა ნოზაძე და მარადი სურმანიძე. მათ შორის საუკეთესოები 11 ივლისს საკონტროლო შეხვედრების შემდეგ გადაწყდება. უფროსებში მედლები აბსოლუტურ წონით კატეგორიაშიც გათამაშდება, მაგრამ მისი მონაწილენი უშუალოდ შეჯიბრების დაწყების წინ გუნდის წევრთაგან შეირჩევიან, ვინც ამის სურვილს გამოთქვამს.
ქალთა ტურნირში შორენა შარაძე, დარინა აბულაძე, დარინა ცინცქილაძე (სამივე - 60), მალვინა ლორთქიფანიძე (70), ირინა ლეონიძე და ლია გვიანიძე (+70) იჭიდავებენ. 20-წლამდელ გოგონათა შორის ცირა აბულაძე (50), სოფიო ბერიძე და ნათია დიასამიძე (ორივე - 60) გამოვლენ, 17-წლამდელებში - გურანდა შოთაძე (50), თუმცა თუ რომელიმე წონაში მონაწილენი არ მოგროვდებიან, მაშინ იქ შეჯიბრება საერთოდ ჩაიშლება და ჩვენებიც პლაჟზე მხოლოდ გასარუჯად გავლენ.
15 ივლისს ჭაბუკები იჭიდავებენ. შეჯიბრება საღამოს, 17 საათზე დაიწყება, ორ საათში კი ჩემპიონატის გახსნის საზეიმო ცერემონიალი გაიმართება. 16 ივლისი უკვე ახალგაზრდებს დაეთმობათ, 17-ში კი ტურნირს უფროსები დახურავენ. ასპარეზობები სამივე დღეს 17 საათზე დაიწყება.
ყოველდღიური სპორტული გაზეთი "ლელო"
