ეროვნული ლიგის XXIX ტურის მიმოხილვა და სიმბოლური ნაკრები

სანაკრებო მატჩების გამო, ეროვნულ ლიგაში ორკვირიანი შესვენება იყო და აი, ჩემპიონატიც ისე განახლდა, უკეთეს ინტრიგას კაცი ვერც ინატრებდა! იმის მიუხედავად, რომ სატურნირო ცხრილში, ფაქტობრივად, არანაირი გადაადგილება არ მომხდარა, ამ ტურის მერე კიდევ უფრო დაიძაბა სიტუაცია ჩემპიონობისთვისაც, IV ადგილისთვისაც და, განსაკუთრებით, გადამრჩენელი, VII ადგილისთვის ბრძოლაში...

ხუთ მატჩში 21 გოლი გავიდა, რაც მეორე მაჩვენებელია მიმდინარე სეზონში. ამაზე მეტი გოლი, მხოლოდ ერთხელ გავიდა: III წრის სასტარტო ტურში - 22. სამაგიეროდ, სწორედ ამ ტურში დაფიქსირდა სხვა სარეკორდო მაჩვენებელი: "საბურთალომ" არასაფეხბურთო ანგარიშით, 6:3 დაამარცხა "კოლხეთი" და ერთ მატჩში გასული 9 გოლი, ეროვნული ლიგის რეკორდია!

XXIX ჩემპიონატის XXIX ტურში კიდევ არაერთი გამორჩეული ფაქტი დაფიქსირდა: ვისთვის წარუმატებელი სერია შეწყდა, ვისთვის - გაგრძელდა, რამდენიმე მართლაც ეფექტური გოლიც ვნახეთ და, რაც მთავარია, გარკვეული პაუზის მერე, ერთდროულად ოთხმა ფეხბურთელმა შეძლო "დუბლის" შესრულება.

გასული ტურის მიმოხილვა კი, რაღა თქმა უნდა, დედაქალაქური "დერბით" უნდა დავიწყოთ...

"დინამოსა" და "ლოკომოტივის" მონაწილეობით ჩატარებული დედაქალაქური დერბი ისეთი გამოდგა, როგორსაც ველოდით: უკომპრომისო და საინტერესო! იმის გარდა, რომ ამ შეხვედრაში გატანილი ოთხივე გოლი ერთმანეთზე ეფექტური იყო, არანაკლებ იმსახურებს აღნიშვნას თამაშის ხარისხიც (განსაკუთრებით, პირველ ტაიმში).

აი, იმ ფაქტზე კი აღარ გავამახვილებთ ყურადღებას, თუ რა საკადრო პრობლემების ფონზე უწევს ჩვენს ყველაზე ტიტულიან გუნდს ლიდერობის შენარჩუნება და კახა კაჭარავას გუნდის გამარჯვება ერთობ სერიოზულ მეტოქესთან მით უფრო დასაფასებელია. სხვათა შორის, "დინამოს" შემადგენლობაში რამდენიმე სიახლეც იყო: 18 წლის ფორვარდი ბექა ქავთარაძე პირველად გამოჩნდა ძირითადში, ხოლო 30 წლის უკრაინელმა მეკარემ სერგეი ლიტოვჩენკომ ოთხთვიანი პაუზის შემდეგ ითამაშა.

გარკვეული საკადრო პრობლემები ჰქონდა გიორგი დევდარიანსაც: "ლოკომოტივს" სათადარიგოთა სკამზე 5 ნომინალური მცველი ჰყავდა...

...ამ სეზონში "დინამომ" ორჯერ "მოასწრო" წაგება "ლოკომოტივთან" და აი, რევანშიც შედგა, თანაც, ჩემპიონატის გადამწყვეტ ეტაპზე! როგორც შემდგომ გაირკვა, აბსოლუტურად სწორი გამოდგა დინამოელთა მთავარი მწვრთნელის მიერ განხორციელებული რამდენიმე გადაადგილება: 19 წლის ცენტრალური მცველი დავით კობოური მარცხენა მცველის ფუნქციას ასრულებდა, სამაგიეროდ, დაცვის ცენტრში გადმოინაცვლა ლაშა თოთაძემ.

29 წლის თოთაძე ამ მატჩის ერთ-ერთი გმირიც გახდა: სწორედ მისი "საფირმო" საჯარიმო დარტყმით გაიხსნა კიდეც ანგარიში დედაქალაქურ დერბიში, რასაც კიდევ ერთი მცველის შედეგიანი თამაში მოჰყვა: 29 წლის გიორგი რეხვიაშვილის თავური დარტყმა ეფექტურიც იყო და, რაც მთავარია, ზუსტიც.

თუმცა, ამის მერე "სცენაზე" უკვე ახალგაზრდა დინამოელები გამოვიდნენ: ტაიმის ბოლო წამებზე, 18 წლის ბექა ქავთარაძის აქტიურობის შემდეგ, 19 წლის ბექა მიქელთაძემ თავისი XII გოლი გაიტანა ეროვნულ ლიგაში და თითქმის ორთვიანი "მშრალი" სერიაც დაასრულა.

მეორე ტაიმის ბოლოს კი დინამოელთა საუკეთესო ბომბარდირი უკვე ასისტენტის როლში მოგვევლინა და მისი ზუსტი პასით, 22 წლის ლაშა ქოჩლაძემ ამ მატჩის საბოლოო ანგარიში დააფიქსირა. აღსანიშნავია, რომ ლაშა ქოჩლაძემ უკვე მეოთხე გოლი გაიტანა თავისი ახალი გუნდის მაისურით, ოთხჯერვე შეცვლაზე შესულმა და ოთხჯერვე - ერთმანეთზე ეფექტურად!..

დაბოლოს, ამ მატჩის, უდავოდ, საუკეთესო ფეხბურთელზეც: "დინამოს" 21 წლის კაპიტანმა ოთარ კიტეიშვილმა ტრავმის მერე მეორე მატჩი ჩაატარა და ისე როგორც წინა შეხვედრაში ("ტორპედოსთან"), ამჯერადაც ყველაზე გამორჩეული გახლდათ ორივე გუნდის შემადგენლობაში!

გასულ ტურში კიდევ ერთი მატჩი იწვევდა განსაკუთრებულ ინტერესს: ბათუმის "დინამო" და "დილა" ხომ ეროვნულ ლიგაში დარჩენისათვის იბრძვიან და უშუალო კონკურენტების ამ დაპირისპირებას ბევრ კითხვაზე უნდა გაეცა პასუხი - გიორგი დარასელიას დამოძღვრილი "დილა" თუ გააგრძელებდა ზედიზედ მოგებათა სერიას, თავის კონკურენტს უკვე 8 ქულით ჩამოიტოვებდა...

წესით, ფრეც არ უნდა ყოფილიყო გორელთა გუნდისათვის ურიგო შედეგი, თუმცა მასპინძლებმა ეს უმნიშვნელოვანესი მატჩი დიდი აღმავლობით ჩაატარეს და მიმდინარე სეზონში მესამედ შეძლეს კონკურენტის დამარცხება. ამ მოგების შემდეგ, კონსტანტინ ფროლოვის ხელმძღვანელობით მოასპარეზე ბათუმის "დინამო" მხოლოდ 2 ქულითღა ჩამორჩება "დილას".

აქვე, ის ორი ფეხბურთელიც უნდა ვახსენოთ, ლომის წილი რომ შეიტანეს გამარჯვებაში. ბათუმელთა გუნდის 25 წლის მეკარემ ანატოლი ტიმოფეევმა საკუთარი გუნდი რამდენჯერმე გადაარჩინა, ხოლო 27 წლის შემტევი ნახევარმცველი ელგუჯა გრიგალაშვილი მიმდინარე სეზონში უკვე მერამდენედ მოევლინა ბათუმის "დინამოს" მხსნელად.

აღსანიშნავია, რომ გრიგალაშვილმა (რომელიც ზაფხულში ჩაირიცხა "დინამოში"), ეროვნულ ლიგაში 4 გოლი გაიტანა და აქედან სამი - გამარჯვების მომტანი იყო!

საჩემპიონო ინტრიგა ბოლო ტურამდე რომ იქნება, ამაში ბევრი დაგვეთანხმება; ისე როგორც დაძაბული ბრძოლაა მოსალოდნელი VII ადგილის დასაკავებლად. თუმცა, არანაკლებ დიდი ინტრიგაა IV ადგილის დასაკავებლადაც: მოვლენების სასურველი სცენარით განვითარების შემთხვევაში, მეოთხეადგილოსანი ხომ ევროპალიგის საგზურს მოიპოვებს.

სწორედ IV ადგილს უმიზნებს "საბურთალოც". მიმდინარე სეზონში მეხუთე მატჩი რომ მოიგო დიდი ანგარიშით, თან მოგებასაც ხომ გააჩნია - გიორგი ჭიაბრიშვილის გუნდმა უფსკრულისაკენ მიმავალი "კოლხეთი" 6:3 დაამარცხა. ერთ მატჩში 9 გოლი მიმდინარე სეზონში პირველად გავიდა!

ისე, ბევრი გოლის ხილვა კი სასიამოვნოა, მაგრამ ვერც იმ ფაქტს გავექცევით, რომ ორივე გუნდის უკანახაზელებმა (განსაკუთრებით - სტუმრების) უამრავი შეცდომა დაუშვეს...

ეს უხვგოლიანი მატჩი იმითაც იყო საინტერესო, რომ ერთდროულად სამმა ფეხბურთელმა შეასრულა დუბლი. არც სტუმართა უკრაინელი ცენტრფორვარდის, 26 წლის ოლექსანდრ დერებჩინსკის წყვილი გოლი უნდა გაჰკვირვებოდა ვინმეს და არც მასპინძელთა 24 წლის გარემარბის ლაშა შინდაგორიძის დუბლიც, რასაც ვერ ვიტყვით "საბურთალოს" ცენტრალური მცველის, 23 წლის დაჩი ცნობილაძის საგოლე ალღოზე, ასევე ორი გოლი რომ გაიტანა იმ გუნდის კარში, რომელსაც უკვე 15 მატჩია არ მოუგია...

"საბურთალოს" კიდევ ერთ ფეხბურთელზეც გვინდა ორიოდ სიტყვა ვთქვათ: გუნდის 22 წლის ახალწვეულმა დავით ვოლკოვმა მეათე მატჩი ჩაატარა ეროვნულ ლიგაში და მერვე გოლიც გაიტანა!..

მიმდინარე სეზონში უკვე მერამდენედ მოხდა, როცა "სამტრედიამ" ამა თუ იმ მატჩის ბედი ბოლო წუთებზე გატანილი გოლ(ებ)ით გადაწყვიტა. ასე მოხდა ამჯერადაც, როცა "ჩიხურასთან" გამართულ იმერულ დერბიში (თბილისმა რომ უმასპინძლა...), სწორედ მატჩის მიწურულს შეძლო ჩემპიონმა უმნიშვნელოვანესი 3 ქულის მოპოვება: შეცვლაზე შემოსულმა 25 წლის გიორგი მჭედლიშვილმა უძლიერესი და ულამაზესი შორეული დარტყმით, თავის გუნდს ტიტულის შენარჩუნების შანსი დაუტოვა.

სხვათა შორის, ამ იმერულ დერბიში მთავარი მოვლენები მეორე ტაიმში განვითარდა: ჯერ იყო და, "ჩიხურას" 29 წლის ცენტრალურმა ნახევარმცველმა თორნიკე გორგიაშვილმა ასევე შორეული და ეფექტური დარტყმით გახსნა ანგარიში.

შემდეგ "სამტრედიას" ლეგიონერთა ჯერიც დადგა: 24 წლის კოტდივუარელმა ცენტრფორვარდმა ინტერს გიიმ მშვენიერი ასისტენტობა გაუწია მაიკლ ოლაიტანს და ასევე 24 წლის ნიგერიელმა შემტევმაც თავისი პირველი გოლი გაიტანა საქართველოს ჩემპიონატში. აქვე დავძენთ, რომ ეს იყო პირველი მოგება "სამტრედიის" მთავარი მწვრთნელის რანგში უჩა სოსიაშვილისთვის, რომელიც ეროვნულ ლიგას სულ ახლახან დაუბრუნდა.

თბილისის "დინამოსა" და "სამტრედიას" გარდა, ეროვნულ ლიგას კიდევ ერთი და საკმაოდ რეალური ფავორიტიც ჰყავს: ქუთაისის "ტორპედო"! მართალია, კონკურენტებისაგან განსხვავებით, კახა ჩხეტიანის გუნდს ამ ტურში შედარებით სუსტი მეტოქე ჰყავდა, მაგრამ არ დაგვავიწყდეს, რომ სწორედ "შუქურამ" დააკარგვინა ქულები წინა ტურებში "ტორპედოს" ორივე კონკურენტს.

თუმცა, გიორგი შაშიაშვილის ხელმძღვანელობით მოასპარეზე "შუქურამ" მორიგი სენსაცია ვეღარ მოახდინა: მასპინძლებმა მთელი მატჩი დამაჯერებლად ჩაატარეს და სრულიად დამსახურებულადაც გაიმარჯვეს. ამ სეზონში მეორე დუბლი შეასრულა "ტორპედოს" ახალწვეულმა, 28 წლის ლევან კუტალიამ: პირველად, როგორც "შუქურას" ფეხბურთელმა, ამჯერად კი უკვე ქუთაისელთა გუნდის მაისურით.

უნდა აღვნიშნოთ 25 წლის გიორგი ქიმაძის გოლიც - ეროვნული ლიგის, უდავოდ, საუკეთესო მარცხენა მცველმა სტუმართა მეკარესთან პირისპირ გასვლა მოხდენილი დარტყმით დაასრულა. აი, "შუქურას" ახალწვეული, 30 წლის დავით ჩაგელიშვილი კი, კუტალიას მსგავსად, თავის მეორე გუნდშიც აგრძელებს გოლების გატანას...

ყოველდღიური სპორტული გაზეთი "ლელო"