"კვარა" და სპალეტი თვითკმაყოფილების გარეშე - "ნაპოლის" სუსტი რგოლი და გაძლიერების რესურსი

მუნდიალის უჩვეულო დროს ჩატარების გამო, წლევანდელი საფეხბურთო სეზონი თავიდანვე გადატვირთული გრაფიკით დაიწყო. ასეთ დროს როტაციას როგორც ჩვეულებრივ ამბავს, ისე განიხილავენ. ლუჩანო სპალეტიც ამ გზით წავიდა და შეიძლება ითქვას, ზუსტად ვიცოდით, დღეს ირვინგ ლოსანო თუ ითამაშებდა, შემდეგ შეხვედრაში მატეო პოლიტანოს ვნახავდით. გარკვეულ მატჩებში ყველაფერი ეს უმტკივნეულოდ ვითარდებოდა, გარკვეულ ეტაპზე კი ამდენმა ცვლილებამ აუტსაიდერებთან ქულების დაკარგვა გამოიწვია.

როგორც კი სანაკრებო ბატალიებიდან დაბრუნებული მოთამაშები მაქსიმალურად ოპტიმალურ ფორმას დაუბრუნდნენ, ბოლო პერიოდში, შეხვედრიდან შეხვედრამდე სპალეტისგან იმაზე ნაკლებ გადახალისებას ვხედავთ, ვიდრე შევეჩვიეთ. "ემპოლისთან" მატჩი ამის კარგი მაგალითი იყო. ჩემპიონთა ლიგაზე გადატანილი ბრძოლის მიუხედავად, სასტარტო თერთმეტეულში მხოლოდ ერთი ცვლილება იყო. 

ახლა საინტერესოა, როგორი იქნება ნეაპოლელთა ფეხბურთელების ფიზიკური მომზადება. კომფორტული სხვაობის მიუხედავად, სეზონის დასკვნითი ნაწილი რთული გამოვა. გარდა ამისა, ზოგიერთი მოთამაშე შეეჩვია ან ელის უფრო მეტ დროს, რიტმიდან ამოვარდნამ კი შესაძლოა, მათი პროდუქტიულობა შეამციროს. ასეთად ჯოვანი სიმეონეს მოაზრებაც შეგვიძლია თუ ამჟამად ტრავმირებული ჯაკომო რასპადორის.

"ნაპოლი" გუნდური კოლექტივია, რომელიც წარმატებას ერთიანობით აღწევს, ყველა რგოლი კი მაქსიმალურად დაბალანსებულია. უკანასკნელ პერიოდში ერთი პოზიცია არსებობს, საიდანაც ყველაზე მეტი პრობლემა იქმნება. საქმე მარცხენა მცველა ეხება.

მარიო რუის 6 საგოლე პასი აქვს და წელს იმაზე შედეგიანია, ვიდრე ოდესმე ყოფილა. მასზე აუგს ვერც დაცვით ფაზაში ვიტყოდით, თუმცა ნელ-ნელა ამაზე საუბარი უკვე წარსულ დროში გვიწევს. მისი ბოლო შედეგიანი პასიც 8 იანვრით ("სამპდორიასთან") თარიღდება. 

ადამიანური ემოციები გასაგებია, თუმცა ის, რაც პორტუგალიელმა მცველმა ემპოლელთა წინააღდმეგ გააკეთა, ეს ამხელა გამოცდილებისა და მნიშვნელობის ფეხბურთელს არ შეეფერება. ამის შესახებ მთავარმა მწვრთნელმაც ისაუბრა და ნაკლებად წარმოსადგენია, მხოლოდ პრესკონფერენციაზე გაჟღერებულით დაკმაყოფილდეს. რუის ახლა დისკვალიფიკაციის მოხდა მოუწევს, ამავდროულად კი უკეთეს ფორმაში უნდა დაბრუნდეს.

რაც შეეხება მატიას ოლივერას. ის ფლანგზე კვარაცხელიასთან კარგად კომბინირებს, თავისუფალ ზონებს ხსნის და იყენებს, თუმცა მასაც, სეზონის დასაწყისი უკეთესი ჰქონდა. ჩემპიონთა ლიგაზე ურუგვაელის თამაში კრიტიკას ვერ უძლებდა. ის დაცვით ფაზაში უფრო გამორჩეულია და შედეგიანი პასები მისი ძლიერი მხარე არასდროს ყოფილა, თუმცა მიუხედავად იმისა, ნეაპოპოლებმა ბოლო 5 მატჩში კარი მშრალად შეინახეს, ოლივერა ისეთივე დამაჯერებელი აღარაა.
მარცხენა ფლანგი ჩვენთვის განსაკუთრებით საინტერესოა, რადგან ხვიჩა კვარაცხელიასთვის მეტად მნიშვნელოვანია, მის ფრთაზე მოთამაშე ფეხბურთელი როგორ ფორმაშია. 

"აიტრახტთან" დაპირისპირებაში კი შევაქეთ, თუმცა ზამბო ანგისა სტაბილურობის დაბრუნებას ვერაფრით ახერხებს. 24-ე ტურის მატჩში რუის გარდა, სუსტი რგოლი თუ ვინმე იყო, სწორედ კამერუნელი შუახაზელი. მართალია, კაცნაკლულად დარჩენის შემდეგ, ნახევარმცველებმა ბევრი სამუშაო ჩაატარეს, როცა ანგისა შეტევით ოპერაციებში ისეთივე წარმატებით არ ერთვება, როგორაც ფრანკფურტელებთან ვნახეთ, სპალეტის გუნდს იერიშების წამოწყება უფრო მეტად გრძელი და დიაგონალური პასებით უწევს. როცა "კვარა" და ოსიმენი გყავს, ყოველთვის შეიძლება გოლი გამოადნო, თუმცა შეტევაში მრავალფეროვნება მნიშვნელოვანია. 

ქართველი გარემარბისგან რაღა უნდა გაგვიკვირდეს, მაგრამ ყველაზე მნიშვნელოვანი ისაა, "კვარადონა" თვითკმაყოფილებას არ ეძლევა და ერთ ადგილას არ დგას, არამედ მოწინააღმდეგეების გაკვირვებას ახალ-ახალი ელემენტებით ახერხებს.

რამდენჯერმე აღვნიშნეთ, რომ კუთხურების დროს ხვიჩას უფრო მეტი შეუძლია, ვიდრე ე.წ. გადმოვარდნილ ბურთებზე თამაშია. როგორც გამოჩნდა, ამაზე მთავარი მწვრთნელი ბევრს ფიქრობდა და მუშაობდა. კვარაცხელიას ძალიან მაღალი დონის, შედეგიანი პასი ზელინსკიზე და სხვა აქტიურობებიც სწორედ ამ პოზიციებიდან ვნახეთ. მეტოქის მეკარეც თანაგუნდელებს აქტიურად მოუწოდებდა, სტანდარტულების დროს საჯარიმოს გარეთ მდგარი 77-ე ნომრისთვის მაქსიმალური ყურადღება მიექციათ.

"ნაპოლი" TOP ლიგებში გამორჩეულია



როცა ჩვენებურის სტატისტიკურ მონაცემებს გთავაზობთ, სულ მივუთითებთ, რომ "კვარა" უფრო მეტია, ვიდრე ეს შედეგები. "ემპოლისთან" ზუსტად ეს ვნახეთ - მშრალად თუ შევხედავთ, ხვიჩას შედეგიანი მოქმედება არ ჰქონია, ამასობაში კი ორივე გოლი ფაქტობრივად, მან შექმნა. ვიქტორ ოსიმენთან მისი შეთამაშება ძალიან მაღალ დონეზეა, თუმცა ნიგიერიელის გაკრიტიკება მაინც მოგვიწევს. პირველ ტაიმში იყო ეპიზოდი, როცა "ცხრიანს" შეტევა კვარაცხელიაზე უნდა გაეგრძელებინა და ყველაფერი ალბათ, გოლით დასრულდებოდა, თუმცა ოსიმენი წმინდა ფორვარდის ინსტიქტით (ეგოისტურს მაინც ვერ დავარქმევთ) მოიქცა და არ შეიმჩნია პარტნიორი, რომელმაც ცოტა ხნის წინ საოცარი "ასისტით" მოამარაგა.

ნეტარებაში არც სპალეტია, მას შარშანდელი ცუდი გამოცდილება ბევრს აფიქრებს, მუდმივად ძიებაშია და სეზონის ბოლომდე დამაჯერებლად მისვლას აპირებს. შემდეგი გაჩერება "ლაციოა". რომში კვარაცხელიამ გამარჯვების (2:1) გაიტანა, ვნახოთ, რა იქნება ნეაპოლში.

ორივე გოლი ხვიჩამ შექმნა - კაცნაკლულმა "ნაპოლიმ" გაიმარჯვა [VIDEO]

სპალეტი: "კვარა" მაგარი ფეხბურთელია და ჯარიმის გარეშე მისი შეჩერება ძნელია