ბუდუ ზივზივაძე: პენალტი რომ დაინიშნა, ბაჩოს გავხედე და დავუთმე

...ის ჩემპიონატის საუკეთესო ბომბარდირი გახდა: 14 შეხვედრაში 13 გოლი გაიტანა და დიდი ალბათობით, ჩემპიონატის საუკეთესო ფეხბურთელადაც აღიარებენ.

"სამტრედიის" თავდამსხმელ ბუდუ ზივზივაძეზე ვლაპარაკობთ. ფინალის ბედი სწორედ ამ 22 წლის შემტევმა გადაწყვიტა: პირველ მატჩში სამტრედიელებმა "ჩიხურა" 2:0 მისი დუბლით სძლიეს, ხოლო საპასუხო შეხვედრაში სტუმართა ორივე გოლში უშუალოდ მონაწილეობდა: ჯერ ლამაზი მოძრაობით მცველი გააცურა და პენალტი დაიმსახურა, მერე კი ეფექტური პასით მეკარესთან პირისპირ გაიყვანა გიორგი დათუნაიშვილი, რომელმაც მეორე გოლი გაატანინა.

- ჩიხურა-სამტრედია 2:2 - საქართველოს ახალი ჩემპიონი ჰყავს! [VIDEO+PHOTO]
- სამტრედია-ჩიხურა 2:0 -

ნოკდაუნი პირველ რაუნდში [VIDEO]

ვინც ზივზივაძის თამაში ნახა, ყველა აღიარებს, რომ საქართველოს ნიჭიერი თავდამსხმელი ეზრდება...

- ძნელი წარმოსადგენი არ არის, რამხელა სიხარულს განიცდით - გუნდი ჩემპიონი გახდა, ფინალურ მატჩებში გატანილ ოთხ გოლში კი უშუალოდ მონაწილეობდით...
- მხოლოდ ჩემი წარმატების გამორჩევა მეუხერხულება - ეს უდიდესი გამარჯვება "სამტრედიას" თითოეული წევრის დამსახურებაა. აწყობილი და დალაგებული გუნდი რომ არ ვყოფილიყავით, თავს ვერც მე გამოვიჩენდი და ვერც რომელიმე სხვა ფეხბურთელი. თუმცა, ცხადია, ჩემი კარგი თამაში მიხარია.

- თერთმეტმეტრიანი "აიკიდეთ", მაგრამ ის არაბულმა შეასრულა - არადა, ასეთ დროს, დაზარალებული ურტყამს, მით უფრო, რომ გუნდის შტატიანი პენალტისტიც ხართ...
- გუნდში ორი პენალტისტი ვართ: თამაშის წინ მწვრთნელი ფურცელზე წერს, რომ ურტყამს ბუდუ ან ბაჩო. პენალტი რომ დაინიშნა, ბაჩოს გავხედე, დარტყმა სურდა... პირველ ფინალში ისედაც გატანილი მქონდა და განზე გავიწიე - მინდოდა, მასაც გაეტანა, რადგან ამას იმსახურებდა. ჩვენ, პირველ ყოვლისა, ძმაკაცები ვართ და ასეთ დროს ეგოისტობა არც მე მახასიათებს და არც მას. ორი გოლი მას რომ გაეტანა, დარწმუნებული ვარ, ჩემს სასარგებლოდაც იმავეს გააკეთებდა.

- მეორე შეხვედრაზე 5 ათასამდე მაყურებელი კი მოვიდა, მაგრამ "დინამო არენაზე" ეს მაინცდამაინც შთამბეჭდავად არ ჩანდა. ასეთ დროს თამაში კომფორტულია?
- რა თქმა უნდა, ბევრად მეტი მაყურებლის მოსვლა გაგვიხარდებოდა. მაგრამ დღევანდელი რეალობა ასეთია - თბილისში ეროვნულ ჩემპიონატს დიდად არ სწყალობენ. ძირითადად ისევ სამტრედიელი და საჩხერელი მაყურებელი მოვიდა.

მაგრამ ამდენის მოსვლაც ძალიან გამიხარდა. ხალხის თანადგომა სულ სხვაგვარი სტიმულია. იმაშიც დარწმუნებული ვარ, რომ მსგავსი მატჩები სტადიონზე ბევრად მეტ მაყურებელს მოიზიდავს. აქვე, მადლობა სამტრედიელებს - საუკეთესო გულშემატკივრები გვყავს და მათი დამსახურებაა, ეს დღე რომ დაგვიდგა. ისინი მართლა ჩვენი მე-12 მოთამაშეები არიან და სადმე მაყურებელი თუ დადის, უპირველესად, ეს სამტრედიაა - ამ ქალაქში ფეხბურთი უზომოდ უყვართ.

- სეზონის დაწყებამდე, "სამტრედიას" ჩემპიონობა ბევრისთვის წარმოუდგენელი იყო, რადგან რეალურად საუკეთესო შემადგენლობა არ გყავდათ...
- ეს ჩვენც გვესმოდა. მაგრამ საუკეთესო ის გუნდი კი არ არის, სადაც სახელ-გვარებით ყველაზე გამორჩეულ მოთამაშეებს შეკრებენ, არამედ ის, სადაც ფეხბურთელების თვისებებს საუკეთესოდ გამოაჩენენ. "სამტრედიაში" ეს გია ცეცაძემ მოახერხა და ამიტომაც არის საქართველოში გამორჩეული მწვრთნელი.

მიმაჩნია, რომ ასეთი გუნდი უკეთეს სტადიონს იმსახურებს. "ეროსი მანჯგალაძეზე" ხელოვნური საფარია, რაც ტრავმიანობის ალბათობას ზრდის და ვარჯიში და თამაში სასიამოვნო არ არის - ყველა ვარჯიშის შემდეგ კუნთები დაჭიმული გვაქვს. რა თქმა უნდა, ბუნებრივ საფარზე თამაში ბევრად გვირჩევნია და იმედია, ჩვენი ხელმძღვანელობა ამ საკითხს მოაგვარებს.

- პირადად თქვენთვის ეს ყველაზე წარმატებული სეზონი იყო...
- მაგრამ მე ამაზე გაჩერება არ მსურს და იმედია, მეტის მიღწევასაც მოვახერხებ.

(იბეჭდება მცირე ცვლილებით)
ყოველდღიური სპორტული გაზეთი "ლელო"