ირაკლი მესხიამ კარიერა უკრაინაში დაიწყო, მაგრამ საქართველოს 17-წლამდელთა ნაკრების კანდიდატი იყო და დღემდე მისი ოჯახი თბილისში ცხოვრობს, თავად კი პოლონეთის რანგით მეორე ლიგის ბინადარ "სტომილში" თამაშობს.უკრაინის ახალგაზრდული ნაკრების ყოფილმა შემტევმა ნახევარმცველმა თავი ბოლო ტურში, "კატოვიცესთან" ფრედ (2:2) დასრულებულ შეხვედრაში გამოიჩინა, როცა მეტოქის კარი მეორედ აიღო.
ადრე ამ 22 წლის ფეხბურთელისადმი საქართველოში დიდი ინტერესი იყო. იმ დროს მესხია უკრაინის უმაღლესი ლიგის კლუბ "ობოლონში" (კიევი) თამაშობდა. ამის შემდეგ ის უკრაინის ერთ-ერთ ყველაზე პოპულარულ კლუბ ხარკოვის "მეტალისტში" ჩაირიცხა, მაგრამ შემდეგ მესხია მხედველობის
და აი, შარშან ის პოლონეთში გამოჩნდა - 2014 წლის მარტში პირველი ლიგის კლუბ ოლსტინის "სტომილში" გადავიდა, რომელიც ამჟამად მე-6 ადგილზე იმყოფება.
"უკრაინაში ყოფნისას, ბოლოს "მეტალისტში" ჩავირიცხე, მაგრამ წამოვედი. საამისო მიზეზებიც მქონდა. პოლონეთში თამაშს იმის იმედად დავთანხმდი, რომ სათამაშო პრაქტიკა მექნებოდა და ექსტრაკლასას (უმაღლესი ლიგა - რედ.) გუნდში გადავიდოდი.
საწყისი 5 ტური კარგად ამეწყო, ყველა მატჩში ვითამაშე, მაგრამ შემდეგ ჯვარედინი იოგები გამიწყდა, ურთულესი ოპერაცია გამიკეთეს და წინა სეზონში მთელი 8 თვე გამოვტოვე", - ამბობს მესხია.
22 წლის ფეხბურთელის თქმით, ახლა ყველაფერი დალაგდა:
"წინა სეზონის ბოლოს ორი თამაში მაინც ჩავატარე და ორივეში გოლი გავიტანე. ძალიან მონდომებული ვიყავი, რადგან კლუბის პრეზიდენტი ტრავმის დროს გვერდში დამიდგა და მინდოდა, იმედები გამემართლებინა.
ახლა სტაბილურად ვთამაშობ და კარგად ვარ. 12 თამაშში 2 გოლი გავიტანე და 7 საგოლე გადაცემა გავაკეთე, 4-ჯერ კი ექსტრაკლასას ინტერნეტგამოცემამ ტურის სიმბოლურ ნაკრებში დამასახელა".
მესხია იმედოვნებს, რომ მალე ძლიერ კლუბში გადავა:
"მადლობა ღმერთს, ახლა თავს კარგად ვგრძნობ და დაიმედებული ვარ. ამჟამად მყავს აგენტი, რომელმაც მითხრა, რომ ჩემზე რამდენიმე შეთავაზება მიიღო. ერთი იყო ყაზახეთიდან. იქ ძალიან კარგი პირობებია, მაგრამ ფულის შოვნას თამაში მირჩევნია, ყაზახეთში წასვლას კი ყოველთვის მოვასწრებ.
უფრო მეტად მეორე ვარიანტით დავინტერესდი. როგორც მენეჯერმა მითხრა, პოლონეთის ექსტრაკლასას კლუბი დაინტერესდა, მოლაპარაკება მიმდინარეობს და, შესაძლოა, დეკემბერში ახალ და გაცილებით ძლიერ გუნდში ჩავირიცხო".
საინტერესოა, რომ მესხიამ მოქალაქეობის შეცვლა გადაწყვიტა:
"მგონი, ძნელი მისახვედრი არ უნდა იყოს, რომ უკრაინის მოქალაქეობა კარიერის ასაწყობად დამჭირდა. ყოველთვის ამ ქვეყნის მადლიერი ვიქნები, რადგან უკრაინამ და იქაურმა ხალხმა ბევრი მომცა და შემძინა.
მაგრამ საქართველოში ვარ დაბადებულ-გაზრდილი და ჩემი ქვეყნის მოქალაქეობის დაბრუნება გულით და სულით მსურს. თუ წარმატებას მივაღწევ, მინდა, რომ ეს საქართველოს სახელით იყოს".
მესხია ამბობს, რომ პოლონეთს კარგად შეეწყო:
"გუნდშიც კარგად მიმიღეს, გულშემატკივრებმაც და მედიამაც. "სტომილს" ძალიან იოლად შევეწყვე. თანაგუნდელებს მოედანზეც კარგად ვუგებ და მის მიღმაც დროს ერთად ვატარებთ.
ვგრძნობ, თამაშიც წამივიდა და ამ ეტაპისთვის, შესაძლო ვარიანტებიდან საუკეთესო არჩევანი გავაკეთე. იმედია, გუნდს წინსვლაში დავეხმარები და კარიერასაც ავიწყობ".
(იბეჭდება მცირე ცვლილებით)
ყოველდღიური სპორტული გაზეთი "ლელო"
