"მადლობის ნაცვლად ქონება წამართვეს, ამიტომ ახლა ვითხოვ სტადიონს, ანუ - ჩემს ქონებას"

პროკურატურამ უკანონოდ ჩამორთმეული ქონების დაბრუნების მორიგი ფაქტის შესახებ განაცხადა. ამჯერად, საქმე გორის თენგიზ ბურჯანაძის სახელობის სტადიონს ეხება, რომელიც 2010 წელს შპს "გრანდ ემ"-მა სახელმწიფოს უსასყიდლოდ გადასცა.

შპს "გრანდ ემ"-ი ამ სტადიონს 2006 წლის დეკემბრიდან ფლობდა, რომელიც აუქციონის წესით 150 ათას ლარად შეიძინა და 2007 წლიდან არენაზე სარემონტო სამუშაოებიც დაიწყო.

"2007 წლამდე სტადიონი ძალიან ცუდ მდგომარეობაში იყო. ამიტომ ჩვენ შეძენისთანავე დავიწყეთ იქ სარემონტო სამუშაოები. დავამონტაჟეთ ინდივიდუალური სავარძლები, მოვაპირკეთეთ და დავამონტაჟეთ ტაბლო. გარდა ამისა, ვაფინანსებთ გუნდს ("დილას"). სტადიონზე ინვესტიციის სახით გავიღეთ ნახევარი მილიონი ლარი და კიდევ ვაპირებდით თანხის დახარჯვას, თუმცა 2010 წელს ხელისუფლებამ სტადიონიც წაგვართვა და კიდევ მილიონნახევარი ლარიც. ეს, ფაქტობრივად, იყო გამოსასყიდი, რომელიც ჩვენი პარტნიორის დაკავების სანაცვლოდ გაგვაღებინეს.

ახლა პროკურატურამ დაადგინა, რომ ჩვენ კანონიერად შევიძინეთ სტადიონი, განვახორციელეთ ინვესტიცია და მერე ეს საკუთრება წაგვართვეს. შესაბამისად, გვცნეს დაზარალებულად. ამისი კომპენსირება უნდა მოხდეს ჩვენი კუთვნილი ქონების უკან დაბრუნებით", - გვითხრა შპს "გრანდ ემ"-ის 100% წილის მფლობელმა მიხეილ ლურსმანაშვილმა.

სტადიონის დაბრუნების პროცესი დროში დაემთხვა თენგიზ ბურჯანაძის სახელობის არენაზე დაგეგმილ სამუშაოებს, რომლის ახლო მომავალში დაწყებაზე ცოტა ხნის წინათ ჩვენი გაზეთის საშუალებითაც გაუწყეთ.

საქმე ისაა, რომ გორმა, თბილისთან ერთად, ამ ზაფხულს ევროპის 19-წლამდელ ფეხბურთელთა ჩემპიონატს უნდა უმასპინძლოს. გახსნის მატჩი, 2 ივლისს, სულაც "თენგიზ ბურჯანაძეზეა" დაგეგმილი. არადა, სტადიონი რეაბილიტაციას საჭიროებს, რისთვისაც 1 350 000 ლარი უნდა გამოყოფილიყო. ამ თანხიდან 560 ათასი ლარი უნდა გაიღოს გორის მერიამ, დანარჩენი კი ცენტრალური ბიუჯეტიდან დაფინანსდება.

გორის საკრებულოში აღნიშნული თანხის გამოყოფასთან დაკავშირებით აზრთა სხვადასხვაობა იყო. დეპუტატების ნაწილი ფულის გამოყოფის წინააღმდეგია, იმ მოტივით, რომ ქონების დაბრუნების შემდეგ სტადიონი მერიის აღარ იქნება და ეს იმავე მერიის მიერ გაწეული არამიზნობრივი ხარჯია.

"საუბარი იმაზე, რომ ჩვენ არამიზნობრივ ხარჯს ვწევთ, არ არის ლეგიტიმური. ქონების დაბრუნება არის ერთ-ერთი და არა ერთადერთი ფორმა. თუ მუნიციპალიტეტი წააგებს ამ დავას, ჩვენ გამოვნახავთ ფორმას, რა გზითაც აუცილებლად მოხდება კომპენსაციის გაცემა.

ჩვენ ევროპის ჩემპიონატის მატჩების ჩატარების უფლება მოგვცეს და ეს შანსი უნდა გამოვიყენოთ. რაც უფრო მეტ ევროპული დონის შეჯიბრებას ჩავატარებთ, მით უკეთესი", - თქვა გორის მერმა ზურაბ ჯირკველიშვილმა.

"მოვისმინე ინტერვიუები, რომელმაც გული მატკინა. ლაპარაკობენ, რომ სტადიონი გორელებს, ადგილობრივ ბავშვებს სჭირდებათ და ასე შემდეგ. დავიწყოთ იმით, რომ მე თავად გორელი ვარ და, თავის დროზე, გაპარტახებული სტადიონი ჩვენს ქალაქს მე გავუკეთე, დავულაგე, მოვუწესრიგე და ხვალ თუ ჩემი იქნება, როგორ ფიქრობთ ის გაუბედურდება?

მე სერიოზულად შეურაცხყოფილი ვარ იმით, რაც მაშინ მოხდა, როცა ამხელა ინვესტიციის შემდეგ, მადლობის ნაცვლად ქონება წამართვეს, ამიტომ ახლა ვითხოვ სტადიონს, ანუ - ჩემს ქონებას. თუ მერს აქვს რაიმე ვარიანტები ამასთან დაკავშირებით, თანახმა ვარ, ვილაპარაკოთ, განვიხილოთ...

გარდა ამისა, თუ მერია აპირებს, გამოყოს თანხა სტადიონის, ანუ ჩემი ქონების გასარემონტებლად, გამოყოს და გაარემონტოს, არც ეს არის პრობლემა. ამასთან, მე ევროპის ჩემპიონატის ამ სტადიონზე ჩატარებასაც არ შევუშლი ხელს", - გვითხრა მიხეილ ლურსმანაშვილმა.

ქალაქის მერი და შპს "გრანდ ემ"-ის ხელმძღვანელი ალბათ მართლაც ისაუბრებენ იმ ფორმაზე, რომელიც ქონების დაბრუნებას ეხება და მივლენ ისეთ გადაწყვეტილებამდე, რომელიც არც არენას დააზარალებს და არც ევროპის ჩემპიონატის ჩატარებას შეუშლის ხელს.

(იბეჭდება მცირე ცვლილებით)
ყოველდღიური სპორტული გაზეთი "ლელო"