კონფედერაციათა თასი: პერსპექტივაზე გათვლილი გერმანია - მხოლოდ სამი ჩემპიონით რუსეთში

გერმანიაში იოახიმ ლიოვის ბოლო გადაწყვეტილებების განხილვა გრძელდება. ერთნი ბუნდესგუნდში სიახლეებს დადებითად აფასებენ, მეორენი კი სკეპტიკურად უყურებენ და ლიოვს არჩევანს უწუნებენ.

გერმანიაში თუ ვეტერანი მარიო გომესის ნაციონალმანშაფტს მიღმა დარჩენას მეტ-ნაკლებად შეეგუენ, ასევე გამოცდილი და ფანების ერთ-ერთი ფავორიტის, მარკო როისის უყურადღებოდ დატოვება უმეტესობას არ მოსწონს. ლიოვი კი ამბობს, რომ ბუნდესნაკრებს დიდი მომავალი, რესურსი და პოტენციალი აქვს. ახლა ვინც ოპტიმალურ ფორმაშია და ვინც შანსს იმსახურებს, ის გამოვიძახეო.

მოქმედმა მსოფლიოს ჩემპიონმა რუსეთში კონფედერაციათა თასზე უნდა ითამაშოს, რომელიც 17 ივნისს დაიწყება და 2 ივლისს დასრულდება. გერმანელებთან ერთად ჯგუფში კამერუნი, ჩილე და ავსტრალია მოხვდნენ. მეორე ჯგუფში კი მასპინძელი რუსეთი, პორტუგალია, მექსიკა და ახალი ზელანდია მოკალათებულან.

გერმანია 19 ივნისს ავსტრალიას დაუპირისპირდება, 22-ში ჩილეს, ხოლო 25 ივნისს ჯგუფურ ეტაპს კამერუნთან დუელით დაასრულებს. ნახევარფინალები 28 და 29 ივნისს გაიმართება, ხოლო 2 ივლისს სანკტ-პეტერბურგში მესამე ადგილი გათამაშდება, მოსკოვში კი ფინალი გაიმართება.

ნაკრებში ერთბაშად 6 ახალწვეულია. ლიოვმა განაცხადში, რომელსაც "პერსპექტიული" უწოდა, "გლადბახის" კაპიტანი ლარს შტინდლი, ბერლინის "ჰერტას" მცველი მარვინ პლატენჰარდტი, ამსტერდამის "აიაქსის" შემტევი ამინ იუნესი, "ლაიპციგის" ნახევარმცველი დიეგო დემე და ჰოფენჰაიმელები - კერემ დემირბაი და სანდრო ვაგნერი შეიყვანა. ამ უკანასკნელმა ნაციონალმანშაფტის პირველი მიწვევა 29 წლის ასაკში მიიღო.

"სანდრო ვაგნერს თავისებური თამაშის სტილი აქვს და ის ძალიან საინტერესო ფეხბურთელია" - ამბობს ლიოვი.

"ჰოფენჰაიმს" მშვენიერი სეზონი ჰქონდა და ლიოვმა "სოფლელების" არაერთ ფეხბურთელს უხმო. კიდევ უფრო კარგი სეზონი ჰქონდა "ლაიპციგს" და არც ეს კლუბი დაჩაგრულა. მაგალითად, 21 წლის თავდამსხმელი ტიმო ვერნერი ასევე განაცხადშია.

კვლავაც გამოძახებულია კევინ ტრაპი. მართალია, "პარი სენ-ჟერმენის" მეკარეს ბუნდესნაკრებში ჯერ ერთი მატჩიც არ ჩაუტარებია, მაგრამ თავის ადგილს ინარჩუნებს და მესამე გოლკიპერად ითვლება.

ლიოვმა კიდევ ბევრი ისეთი ფეხბურთელი გამოიძახა, რომელსაც არც ისე დიდი სანაკრებო გამოცდილება აქვს, მაგრამ ჰერ იოახიმი მომავალზე ზრუნავს და თანაც, გამორჩეულ ლიდერებს გადატვირთული სეზონის მერე ასვენებს, მიწვეულებს კი თავის გამოჩენის შანსს აძლევს. 2014 წლის მსოფლიოს ჩემპიონატის მომგები ფეხბურთელებიდან კონფედერაციათა თასზე 3 მოთამაშე იქნება - მატიას გინტერი, იულიან დრაქსლერი და შკოდრან მუსტაფი.

ტონი კროოსი, სამი ხედირა, მატს ჰუმელსი, თომას მიულერი, ჯერომ ბოატენგი და მესუთ იოზილი დაისვენებენ. ბუნდესნაკრების თავკაცი გადატვირთულ კალენდარზე და თავისი ვარსკვლავების გადაღლილობაზე ფიქრობს და ღელავს. ლიოვმა გადაწყვიტა, რომ ჯობია, როისმაც დაისვენოს, მაგრამ მას ტრავმებით გატანჯული სეზონი ჰქონდა და ზუსტად ამიტომ ელოდნენ, რომ მარკო ნაკრებში იქნებოდა, რომ ნაციონალმანშაფტის გემოც კარგად გაეხსენებინა. მანუელ ნოიერი, ილქაი გიუნდოგანი, იულიან ვაიგლი, ბენედიქტ ჰიოვედესი და მარიო გიოტცე კი ტრავმირებულნი არიან.

ერთი სიტყვით, ნაკრები ერთობ ექსპერიმენტული იქნება, მაგრამ ლიოვი ფანებს დაჰპირდა, რომ მიდგომა სერიოზული და "ბოლომდე გერმანულია".

"კონფედერაციათა თასს ისევე მივუდგებით, როგორც ევროპის ან მსოფლიოს ჩემპიონატს. ეს ჩვენთვის ძალიან სერიოზული ტურნირია, რომელშიც საჭირო გამოცდილება უნდა მივიღოთ. 2018 წლის მუნდიალს მაქსიმალურად მომზადებულნი უნდა შევხვდეთ" - თქვა ლიოვმა.

საბოლოო განაცხადის შედგენამდე ლიოვმა 21-წლამდელთა ნაკრების მწვრთნელთან, შტეფან კუნცთან გაიარა კონსულტაცია, რადგან არაერთი ფეხბურთელი კუნცის გუნდს "წაართვა". მათ გადაწყვეტილებები ერთობლივად მიიღეს.

დაბოლოს, გუნდს ლეროი სანე დააკლდა, "სიტის" ფორვარდმა გადაწყვიტა, ცხვირის ოპერაცია გაიკეთოს. ლიოვს მისი შემცვლელი ჯერ არ დაუსახელებია.

მეკარეები: ბერნ ლენო (ლევერკუზენი), კევინ ტრაპი (პსჟ), მარკ-ანდრე ტერ შტეგენი (ბარსელონა)

მცველები: მატიას გინტერი (დორტმუნდი), იონას ჰექტორი (კიოლნი), ბენჯამინ ჰენრიკსი (ლევერკუზენი), შკოდრან მუსტაფი (არსენალი), მარვინ პლატენჰარდტი (ჰერტა), ანტონიო რიუდიგერი (რომა), სებასტიან რუდი (ჰოფენჰაიმი), ნიკლას ზიულე (ჰოფენჰაიმი)

ნახევარმცველები: ჯოშუა კიმიხი (ბაიერნი), იულიან ბრანდტი (ლევერკუზენი), ემრე ჯანი (ლივერპული), კერემ დემირბაი (ჰოფენჰაიმი), დიეგო დემე (ლაიპციგი), იულიან დრაქსლერი (პსჟ), ლეონ გორეტცკა (შალკე), ლარს შტინდლი (გლადბახი), ამინ იუნესი (აიაქსი)

თავდამსხველები: ტიმო ვერნერი (ლაიპციგი), სანდრო ვაგნერი (ჰოფენჰაიმი).

ყოველდღიური სპორტული გაზეთი "ლელო"