მესამე ლეგენდაც წავიდა: გარნეტი ბრაიანტსა და დანკანს მიყვა

ეროვნული საკალათბურთო ასოციაციის ვეტერანმა ვარსკვლავმა კევინ გარნეტმა ოფიციალურად გამოაცხადა კარიერის დასრულების შესახებ. ლეგენდარულმა ფორვარდმა კობი ბრაიანტსა და ტიმ დანკანს მიბაძა და "მინესოტას" საწვრთნელი ბანაკის გახსნიდან ოთხი დღით ადრე დატოვა დიდი კალათბურთი.

"მიჭირს სიტყვებით ჩემი მადლიერების გამოხატვა. უბრალოდ მადლობელი ვარ თქვენი სიყვარულის გამო. არასოდეს მეგონა, თუ ხალხს ასე ვეყვარებოდი", - განაცხადა სპეციალურად ჩაწერილ ვიდეოში გარნეტმა.

თავისი გადაწყვეტილების შესახებ, კევინმა შაბათს ამცნო "მინესოტას" ხელმძღვანელობას. როგორც იტყობინებიან, კლუბი და კალათბურთელი მორიგდნენ კონტრაქტის გამოსყიდვაზე, რომლის მიხედვითაც, გარნეტს 2016-17 წლების სეზონში 8 მილიონი დოლარი უნდა გამოემუშავებინა.

"დიდი სიამოვნება იყო იმაზე დაკვირვება, როგორ ყალიბდებოდა ახალგაზრდა გარნეტი NBA-ის ერთ-ერთ საუკეთესო კალათბურთელად. მე ამ პროგრესის უშუალო მოწმე ვიყავი. ის ჩემს თვალწინ ჩამოყალიბდა გუნდის ლიდერად. წარმატებას ვუსურვებ კევინს მისი ცხოვრების ახალ ეტაპზე. "მინესოტას" ფანები ყოველთვის თბილად გაიხსენებენ იმ წარმატებებს, რომელიც გარნეტის სახელს უკავშირდება", - განაცხადა "ტიმბერვულვზის" მფლობელმა გლენ ტეილორმა.

გარნეტის ანგარიშზე NBA-ში 1462 მატჩია, რომლის განმავლობაშიც, საშუალოდ, 17.8 ქულასა და 10.0 მოხსნას აგროვებდა. შარშან, მან 38 მატჩი ჩაატარა რეგულარულ სეზონში და 3.2 ქულითა და 3.9 მოხსნით დაეხმარა თავის გუნდს.

კევინი "მინესოტას" ყველა დროის რეკორდსმენია რამდენიმე კატეგორიაში: თამაშები (970), წუთები (36 189), ქულები (19 201), მოხსნები (10 718), დაფარებები (1 590), პასები (4 216), ჩაჭრები (1 315), ორმაგი დუბლები (607) და სამმაგი დუბლები (16).

გარნეტი ერთხელ იყო NBA-ის ჩემპიონი "ბოსტონის" შემადგენლობაში.

მომდევნო სეზონი გარნეტისთვის 22-ე უნდა ყოფილიყო ეროვნულ საკალათბურთო ასოციაციაში, რაც NBA-ის აბსოლუტური რეკორდი იქნებოდა. გარნეტამდე, 21 სეზონი მსოფლიოს უძლიერეს ლიგაში მხოლოდ რობერტ პერიშსა და კევინ უილისს უთამაშიათ.

ყოველდღიური სპორტული გაზეთი "ლელო"