მსოფლიო თასის საკვალიფიკაციო ფორმატი ცნობილია - როგორია საქართველოს ნაკრების შანსები

მსოფლიო რაგბიმ 2023 წლის მსოფლიო თასის საკვალიფიკაციო ეტაპის დეტალები გამოაქვეყნა.

2019 წლის მსოფლიო თასის საკვალიფიკაციო ეტაპისგან განსხვავებით, ისე, როგორც წინა წლებში, ევროპას ორი პირდაპირი (4 წლის წინ 1-მდე შემცირდა) ადგილი დაუბრუნდა. შედეგად, 2023 წლის საგზურს რაგბი ევროპის ჩემპიონატის ორი მოწინავე გუნდი მიიღებს (2021/22 წლების შედეგების მიხედვით), მესამე კი დასკვნით საკვალიფიკაციო ეტაპში, რეპეშაჟში ჩაერთვება.

საფრანგეთში თამაში უკვე დაბევებული აქვს იმ 12 გუნდს, რომლებმაც იაპონიაში ჯგუფურ ეტაპზე პირველი-მესამე ადგილები დაიკავეს. ესენი არიან: სამხრეთი აფრიკა, ინგლისი, ახალი ზელანდია, უელსი, იაპონია, საფრანგეთი, ავსტრალია, ირლანდია, შოტლანდია, იტალია, არგენტინა, ფიჯი.

დარჩენილი 8 ადგილიდან ორი ევროპას ერგება. ასევე ორ პირდაპირ საგზურს მიიღებს ამერიკა, მესამე კი რეპეშაჟში ჩაერთვება. თითო ადგილი ერგება აფრიკისა და ოკეანეთის გამარჯვებულებს. ოკეანეთის გამარჯვებული 2021 წელს, სამოასა და ტონგას შორის ორმატჩიანი დუელით (შინ და გარეთ) გამოვლინდება. ამ წყვილში დამარცხებული გუნდი საფრანგეთის საგზურისთვის ასევე შინ და გარეთ აზიის შესარჩევი ტურნირის გამარჯვებულს შეხვდება, დამარცხებული კი რეპეშაჟში გადაინაცვლებს.