U18. საქართველო-იაპონია 42:17 - ისევ ფინალში, ისევ ფრანგებთან! [VIDEO]

საქართველოს 18-წლამდელთა ნაკრებმა "რაგბი ევროპის ღია ჩემპიონატის" ნახევარფინალურ მატჩში იაპონიის ნაკრები დაამარცხა - 42:17 და ზედიზედ მესამედ ტურნირის ფინალში გავიდა, სადაც 15 აპრილს, მასპინძელ საფრანგეთს დაუპირისპირდება.

"უმცროსმა ბორჯღალოსნებმა" მეტოქეს, ფაქტობრივად, ყველა კომპონენტში აჯობეს. სისწრაფე, გამძლეობა, ფიზიკური ძალა, სტატიკურ მდგომარეობაში თამაში. იაპონელებს თითქოს რაკში თამაშისას ჰქონდათ უპირატესობა, მაგრამ მატჩის მეორე ნახევარში ჩვენმა მორაგბეებმა ამ კომპონენტსაც აუღეს ალღო.

აღსანიშნავია, რომ ჩვენმა მორაგბეემა მეტოქე ერთი-ერთზე ორთაბრძოლებშიც დაჩაგრეს. ხაზი უნდა გაესვას იმ ფაქტს, რომ "უმცროსმა ბორჯღალოსნებმა" თითო ლელო ორივე ტაიმის დასაწყისშივე მიითვალეს. მორკინალებს შესანიშნავად უბამდნენ მხარს უკანახაზელები. ექვსი ლელოდან ორი მესამეხაზელმა გიგი ლეშკაშელმა მიითვალა, თითო ოთარ ძაგნიძის, კონსტანტინე მარჯანიშვილის, საბა ხურცილავასა და ლევან ნარიმანიძის ანგარიშზეა. თედო აბჟანდაძემ თითო საჯარიმო და გარდასახვა გაიტანა. მას ფულბეკი გიორგი ასათიანი წამოეშველა, რომელმაც ერთი საჯარიმო და ორი გარდასახვა მიითვალა.

საქართველოს ნაკრები ფინალში საფრანგეთის გუნდს დაუპირისპირდება, რომელმაც ნახევარფინალში პორტუგალიას სძლია - 47:0.

საქართველო: 15. გიორგი ასათიანი, 14. კონსტანტინე მარჯანიშვილი, 13. დემურ თაფლაძე, 12. ლაშა ლომიძე, 11. ოთარ ძაგნიძე, 10. თედო აბჟანდაძე, 9. საბა ხურცილავა. 1. ლუკა ჭელიძე, 2. სოსო ჭყოიძე, 3. ლუკა აზარიაშვილი, 4. ლუკა გელაშვილი, 5. საბა ჯღარკავა, 6. რატი ჟორჟოლიანი, 7. ბექა ყორიაული, 8. გიგი ლეშკაშელი.
სათადარიგოები: 16. გიორგი ახალაძე, 17. ვანო კარკაძე, 18. გია ხარაიშვილი, 19. ნიკა წივწივაძე, 20. კობა კოლოტაური, 21. მიხეილ ალანია, 22. რევაზ ხარაზიშვილი, 23. ლევან ნარიმანიძე, 24. ირაკლი სიმსივე, 25. იოანე იაშაღაშვილი, 26. გოჩა ჩანადირი.
6ლ: ხურცილავა, ძაგნიძე, ლეშკაშელი (2), ნარიმანიძე, მარჯანიშვილი, 2ს: აბჟანდაძე, ასათიანი. 3გ: აბჟანდაძე, ასათიანი (2)

რაგბი ევროპის ღია ჩემპიონატი
V-VIII ადგილებისთვის
ბელგია-კანადა 19:0
ესპანეთი-აშშ 26:22

ნახევარფინალი
საქართველო-იაპონია 42:17
საფრანგეთი-პორტუგალია 47:0

VII ადგილისთვის
კანადა-აშშ

V ადგილისთვის
ბელგია-ესპანეთი

III ადგილისთვის
იაპონია-პორტუგალია

ფინალი
საქართველო-საფრანგეთი

(იბეჭდება მცირე ცვლილებით)
ყოველდღიური სპორტული გაზეთი "ლელო"