შურისძიების საფრთხე, ახალი მწვრთნელის კანდიდატურები - ძიუდოს ამბების გაგრძელება

ფედერაციის პრეზიდენტის პასუხი ოსაკაში მომხდარ შესაძლო ინციდენტზე - ინტერვიუ გიორგი ათაბეგაშვილთან

აღმასკომის სხდომა შაბათს დაინიშნა. ჟურნალისტები ცოტათი ადრე მივედით. სანამ აღმასკომი სრულად შეიკრიბებოდა, ნაწილი ფოიეში საუბრობდა. მაგალითად, ნათლად გვესმოდა ის, რომ ფედერაციის ვიცე-პრეზიდენტი მეორე აღმასკომის წევრს იაპონიაში მომხდარ ჩხუბზე უყვებოდა, მოჩხუბარ სპორტსმენებს აკრიტიკებდა და გამშველებლებზეც საუბრობდა. უნდა აღინიშნოს ისიც, რომ ეს საუბარი თითქმის იდენტური იყო sportall.ge-ს მიერ გავრცელებული ამბისა.

"შავდათუაშვილი მაგრად უცემიათ" - რა მოხდა ოსაკაში ქართველ ძიუდოისტებს შორის?

თუმცა სხდომის დასრულების შემდეგ ძიუდოს ფედერაციის პრეზიდენტმა გიორგი ათაბეგაშვილმა ეს ფაქტი კვლავ არ დაადასტურა და გვაუწყა, რომ გამოძიება დაიწყებოდა. კომისიაში კი შევიდოდნენ: განათლების, მეცნიერების, კულტურისა და სპორტის სამინისტროს, საქართველოს ეროვნული ოლიმპიური კომიტეტის, პარლამენტის სპორტის კომიტეტის წარმომადგენლები, ასევე, ვეტერანი ძიუდოისტები და სპორტული ჟურნალისტები. ეს გარკვეულწილად საკმაოდ კარგი დაზღვევაა გიორგი ათაბეგაშვილისთვის, რადგან ის თუ დაადასტურებდა ფაქტს და გადაწყვეტილებას ერთპიროვნულად მიიღებდა, შეიძლება მის სკამს ძიუდოისტების საპასუხო რეაქციისთვის ვერ გაეძლო.

ამ შემთხვევაში კი მოკვლევაში საკმაოდ ბევრი ადამიანი ჩაერთვება და გარკვეული სპორტსმენების ბრალეულობის გამოვლენის შემთხვევაში დასჯაც უფრო მარტივი იქნება. თუმცა მანამდე აღმასკომმა კიდევ ერთი არაადეკვატური გადაწყვეტილება მიიღო, ამ სპორტსმენებს არავინ უშლის ჩინეთში, გუანჟოუში წასვლას და არც არავინ ფიქრობს შესაძლო საფრთხეზე. ჩინეთში შემდეგი შემადგენლობა მიდის: ამირან პაპინაშვილი, ლუხუმ ჩხვიმიანი, ვაჟა მარგველაშვილი, ლაშა შავდათუაშვილი, ბექა ღვინიაშვილი, ვარლამ ლიპარტელიანი და გურამ თუშიშვილი.

ვინმე არის გარანტორი იმისა, რომ გუანჟოუში ის სპორტსმენები, რომლებიც ოსაკაში დაიჩაგრნენ ჩხუბში, შურისძიებას არ ეცდებიან ან ტრადიციულად, სასტუმროს ნომერ-ნომერ არ გააგრძელებენ საქმის გარჩევებს? მით უმეტეს, იმ ფონზე, როცა ამ შემთხვევაში გორელ სპორტსმენებს გარკვეული უპირატესობაც კი ექნებათ. ან რატომ უნდა იჭიდაოს ჩვეულებრივად იმ სპორტსმენმა, რომელმაც თანამოძმეს ხელი დაარტყა? მე თუ მკითხავთ, ბექა ღვინიაშვილის, ამირან პაპინაშვილისა და გურამ თუშიშვილის გარდა, გამოძიების დასრულებამდე სხვა არცერთ სპორტსმენს არ უნდა მიეღო მონაწილეობა.

ამასობაში ფედერაცია საქართველოს ჩემპიონატამდე მწვრთნელს ეძებს და პირობას იძლევა, რომ ნაკრებს ახალი მწვრთნელი ეყოლება. ჩვენ უკვე გავაჟღერეთ ჯარჯი ზვიადაურის კანდიდატურა, რომელიც ძალიან სურს ფედერაციას, თუმცა ჯერ უცნობია თვითონ კანდიდატის დამოკიდებულება. ჩვენი ინფორმაციით, აღმასკომმა კიდევ სამი კანდიდატურა განიხილა: გურამ მოდებაძე, გია თენაძე და ლაშა გუჯეჯიანი. ამ სამიდან ორი შეიძლება წყვილშიც კი ვიხილოთ.

P.S. დაუსჯელობის სინდრომი ახალისებს დამნაშავეს. უნდა დაისაჯოს ყველა ძიუდოისტი, რომელმაც ამ ფაქტში უშუალო მონაწილეობა მიიღო და ამავდროულად, დამალა. სასჯელი უნდა შეეხოს ყველას, ეს წამყვანი ძიუდოისტი იქნება თუ არა. ვიმედოვნებთ, განტევების ვაცს არ იპოვიან და ერთ-ერთი ნაკლებად ძლიერი ძიუდოისტის დასჯით არ შემოიფარგლებიან.

გიორგი ათაბეგაშვილი: შეიქმნება კომისია, რომელიც დაადგენს მოხდა თუ არა ოსაკაში ინციდენტი